शालेय सहलीच्या निमित्ताने ‘लालपरी’मधून प्रेक्षणीय स्थळांना भेट देण्याचा शाळकरी मुलांचा आनंद औरच असतो. मुलांचा हा आनंद द्विगुणित करण्याच्या दृष्टीने एसटी महामंडळाने पाऊल टाकले आहे. आता शालेय सहलीसाठी एसटीच्या नवीन बसेस उपलब्ध केल्या जाणार आहेत. त्यानुसार राज्यभरातील 251 आगारांमधून दररोज 800 ते 1000 गाड्या शाळकरी मुलांच्या सेवेत धावणार आहेत.
दिवाळीनंतर शालेय सहलींना सुरुवात होते. सरकार एसटीच्या माध्यमातून विद्यार्थ्यांना शालेय सहलीसाठी एकूण भाड्यामध्ये 50 टक्क्यांची सवलत देते. त्यानुसार अनेक वर्षांपासून शाळा-महाविद्यालये एसटीच्या बरोबरीने शालेय सहलीचे नियोजन करीत आहेत. यंदा राज्यातील एसटीच्या 251 आगारांमधून दररोज 800 ते 1000 बसेस विविध शाळा-महाविद्यालयांच्या सहलीच्या निमित्ताने प्रेक्षणीय स्थळांना भेट देणार आहेत. त्या बसेसचे आरक्षण व इतर नियोजन करण्यासाठी सध्या आगारप्रमुख, स्थानकप्रमुख स्वतः शाळा-महाविद्यालयांना भेट देत आहेत.
गतवर्षी शालेय सहलींतून 92 कोटींचा महसूल जमा
गेल्या वर्षी नोव्हेंबर ते फेब्रुवारीदरम्यान शालेय सहलीसाठी एसटी महामंडळाने 19624 बसेस उपलब्ध केल्या होत्या. त्या माध्यमातून एसटीला 92 कोटी रुपयांचा (प्रतिपूर्ती रकमेसह) महसूल प्राप्त झाला होता. राज्याचे परिवहन मंत्री प्रताप सरनाईक यांनी ही माहिती दिली.
