रिक्षा-टॅक्सीचालकांसह ओला-उबर व इतर खासगी प्रवासी वाहनांविरोधात परिवहन विभागाच्या टोल फ्री क्रमांकावर फोन कॉल्सच्या माध्यमातून प्रवाशांच्या दररोज 15 ते 20 तक्रारी प्राप्त होत आहेत. सहा महिन्यांत 1499 तक्रारींचे कॉल्स प्राप्त झाले. जवळचे भाडे नाकारणे, अधिक भाडे घेणे, उद्धट वागणे अशा चालकांच्या गैरवर्तनाबाबत प्रवासी तक्रारी करीत आहेत. त्याआधारे परिवहन विभागाने (आरटीओ) बेशिस्त चालकांना कारवाईचा दणका दिला आहे.
शहर परिसरातील टॅक्सीचालक तसेच पूर्व व पश्चिम उपनगरांतील रिक्षाचालकांच्या मनमानी आणि गैरवर्तणुकीने प्रवासी त्रस्त झाले आहेत. प्रवाशांना संकटकाळातही रिक्षा-टॅक्सीचालकांकडून भाडे नाकारण्याचा कटु अनुभव घ्यावा लागत होता. या पार्श्वभूमीवर प्रवाशांना दिलासा देण्याच्या हेतूने आरटीओने 16 जून 2025 रोजी खासगी प्रवासी वाहनांविरुद्ध तक्रारी नोंदवण्यासाठी 1800-220-110 हा टोल फ्री क्रमांक सुरू केला. या क्रमांकामुळे अनेक बेशिस्त वाहनचालकांना ताळय़ावर आणण्यात आरटीओला यश आले आहे. हा टोल फ्री क्रमांक प्रवाशांसाठी 24 तास उपलब्ध ठेवण्यात आला आहे.
‘टोल फ्री’वर कॉल अन् तत्परतेने कारवाई
z टोल फ्री क्रमांकाच्या विशेष कक्षात आरटीओचे कर्मचारी मुंबई शहर परिसर, पूर्व व पश्चिम उपनगरांतील प्रवाशांच्या तक्रारी नोंदवून घेतात.
z बेशिस्त चालकाची रिक्षा वा टॅक्सीची ज्या आरटीओ कार्यालयात नोंदणी झाली आहे त्या कार्यालयांकडे प्रवाशांची तक्रार ई-मेलद्वारे फॉरवर्ड केली जाते.
z तक्रारीला अनुसरून पुढील कारवाईचा पाठपुरावा केला जातो. मुंबई आरटीओ पश्चिम कार्यालयाकडून संबंधित कार्यालयांशी संपर्क साधला जातो.
z या प्रक्रियेच्या माध्यमातून बेशिस्त रिक्षा-टॅक्सी चालक, ओला-उबर वा इतर प्रवासी वाहनांचे परमीट निलंबित करणे, दंड ठोठावणे किंवा गाडी ‘ब्लॅकलिस्ट’मध्ये टाकणे यांसारखी कारवाई केली जाते.
सहा महिन्यांतील तक्रारींचे कॉल्स
जून 42
जुलै 271
ऑगस्ट 275
सप्टेंबर 224
ऑक्टोबर 312
नोव्हेंबर 375
