पुण्यात लग्नसमारंभ म्हणजे आता ‘इव्हेंट मॅनेजमेंट’चीच सरबत्ती! मुंज-बारसं-डोहाळे जेवणापासून सरळ ‘प्री-वेडिंग’पर्यंत सर्व काही मॅनेजमेंट गुरूंच्या हाती. आणि आता या गुरूंना हेरिटेज वास्तूची मोहिनी पडली आहे. लाखो रुपयांच्या पॅकेजसह हे मॅनेजमेंट सम्राट आणि फोटोग्राफर मंडळी सरळ पुण्याच्या ऐतिहासिक मंडईत शिरकाव करून नवदाम्पत्याचे ‘पोझ’ टिपत आहेत. पण या ‘पोझ’मुळे खऱया अर्थाने कोणी बळी जात असेल तर ते म्हणजे इथले भाजीविक्रेते!
भाजी मंडईत सुरू असलेल्या या फोटोशूटदरम्यान नवदाम्पत्याच्या हातात भाजीची परडी, टोमॅटोची पिशवी, कोथिंबिरीचा गुच्छ देण्याचा कार्यक्रम रंगात चालतो. पण फोटो काढून झाले की ही भाजी तिथेच पडून राहते. ग्राहक येतो तो फोटोशूटमुळे त्रस्त होऊन परत फिरतो. दिवसभर जागा अडवून व्यवसायावर कुरघोडी करणाऱया या प्रकारामुळे भाजीविक्रेत्यांचा संताप उफाळून आला आहे.
मंडईतील कल्लोळ संपत नाही तोच हा फोटोशूटचा मोर्चा पुढे बाबूगेनू चौकातल्या फूलबाजाराकडे सरकतो. तिथे गुलाब गुच्छ, रंगीबेरंगी कुंडय़ा, बास्केट हातात घेऊन नवदाम्पत्याचे आणखी ‘ड्रीमिंग’ फोटोसेशन! पण यामध्ये फूलविक्रेत्यांच्या खऱया ग्राहकांकडे पाहायला न वेळ, न जागा. ग्राहकदेखील वैतागून रिकाम्या हाताने पुढे निघून जात असल्याने विक्रेत्यांची अडचण होत आहे.
मार्च-एप्रिल-मे लग्नसराईची चाहूल लागताच प्री-वेडिंगचे बुकिंग एक वर्ष आधीच भरभरून! सवलतीचा गुलाबी आमिष दाखवूनही या पॅकेजेसची सुरुवात थेट तीन लाखांपासूनच. पण या चमकदार पॅकेजांच्या मागे त्रास सोसणारे सामान्य विक्रेते – याचे उत्तरदायित्व कोण घेणार?
“हेरिटेज वास्तूचं पावित्र्य जपायचं आणि आमचा रोजचा व्यवसाय बुडवायचा? आम्ही दिवसभर भाजी विकून घर चालवतो. फोटोशूटवाल्यांनी जागा अडवून आमचे ग्राहक पळवले तर जबाबदार कोण?’’ असा थेट सवाल मंडईतील भाजीविक्रेते अशोक शिंदे यांनी महापालिकेला केला आहे. आता महापालिका यावर काही नियमावली आणते का, की मंडईतला हा ‘प्री-वेडिंग’चा गोंगाट असाच सुरू राहणार, याकडे सर्वांचे लक्ष लागले आहे!
