दक्षिण आफ्रिकेविरुद्ध घरच्या मैदानावर झालेल्या कसोटी मालिकेत हिंदुस्थानला मानहानीकारक पराभवाचा सामना करावा लागला. दोन कसोटी सामन्यांच्या मालिकेत हिंदुस्थानला 2-0 असा व्हाईट वॉश मिळाला. याआधी न्यूझीलंडनेही हिंदुस्थानला व्हाईट वॉश दिला होता. यावर आता हिंदुस्थानचा दिग्गज फिरकी गोलंदाज हरभजन सिंग याने मोठी प्रतिक्रिया दिली. कसोटीसाठी आवश्यक असा एकही तज्ञ ऑफ स्पिनर हिंदुस्थानकडे नसल्याचे तो म्हणाला.
आर. अश्विन याच्या निवृत्तीनंतर SENA (दक्षिण आफ्रिका, इंग्लंड, न्यूझीलंड आणि ऑस्ट्रेलिया) देशाविरुद्ध खेळलेल्या पहिल्या कसोटी मालिकेत हिंदुस्थानपेक्षा पाहुण्या संघाचे फिरकीपटूंनी चांगली कामगिरी केली. आफ्रिकेच्या फिरकीपटूंनी दोन कसोटीत 25 विकेट्स घेतल्या. याबाबत विचारले असता हरभजन म्हणाला की, हिंदुस्थानकडे कसोटीसाठी आवश्यक असा एकही तज्ञ ऑफ स्पिनर नाही. तामिळनाडूचा अष्टपैलू खेळाडू वॉशिंग्टन सुंदर याला स्वत:ला सिद्ध करण्यासाठी आणि अश्विनची जागा घेण्यासाठी अजून बराच पल्ला गाठावा लागेल. ‘8 जेजे स्पोर्टस’च्या उद्घाटन प्रसंगी तो बोलत होता.
वॉशिंग्टन सुंदर याला जास्त गोलंदाजी करावी लागेल. त्याला कसोटीत 30 ते 35 षटके गोलंदाजी करावे लागेल, तर तो एक चांगला गोलंदाज बनेल, असेही हरभजन म्हणाला. तसेच हिंदुस्थानने घरच्या कसोटी सामन्यांसाठी पहिल्या दिवसापासून फिरकीला साथ देणाऱ्या खेळपट्ट्या बनवण्याची सवय सोडावी. ज्या प्रकारच्या खेळपट्ट्यांवर आम्ही खेळतो तिथे प्रत्येक चेंडू वळतो. खरे तर चांगल्या खेळपट्टीवर जो बळी घेतो तो चांगला गोलंदाज मानला जातो. अशा खेळपट्ट्यांमुळे क्रिकेटची वाढ खुंटलेली आहे. आपण एकाच ठिकाणी अडकलो असून जेव्हा आपण चांगल्या खेळपट्टीवर खेळतो तेव्हा आरसा पाहण्याची वेळ येते, असेही तो म्हणाला.
आपण इंग्लंडला गेले तेव्हा खूप चांगले खेळलो. तिथे शुभमन गिल याने 754 धावा कुटल्या होत्या आणि आपल्या संघाला पाच कसोटी सामन्यांच्या मालिकेत 2-2 अशी बरोबरी साधून दिली. अशाच चांगल्या खेळपट्ट्या आपण घरच्या मैदानावर बनवायला हव्यात. कसोटी क्रिकेट वाचवायचे असेल तर चांगल्या ट्रॅकवर खेळण्यास सुरुवात करावी लागेल, असेही तो म्हणाला.
