राज्याचे उपमुख्यमंत्री एकनाथ शिंदे यांच्या साताऱ्यातील दरे गावाजवळ सावरी येथील तेजयश रिसॉर्टवर पोलिसांनी धाड टाकत 45 किलोंचे अंमली पदार्थ जप्त केले. आंतरराष्ट्रीय बाजारामध्ये या अंमली पदार्थांची किंमत 145 कोटी रुपये इतकी आहे. हे रिसॉर्ट एकनाथ शिंदे यांचे सख्खे भाऊ प्रकाश संभाजी शिंदे यांच्या मालकीचे असून सातारा पोलीस अधीक्षक तुषार दोषी यांनी ही माहिती लपवून ठेवण्याचा खळबळजनक आरोप शिवसेना( उद्धव बाळासाहेब ठाकरे) पक्षाच्या उपनेत्या सुषमा अंधारे यांनी आज पत्रकार परिषदेत केला.
सुषमा अंधारे यांनी रिसॉर्टच्या मालकीबद्दल प्रकाश संभाजी शिंदे यांच्या नावावरील सातबारा उतारे, त्याचबरोबर पोलिसांनी छापेमारी करतानाचे व्हिडिओ तसेच आवश्यक ते पुरावे सादर करून ड्रग्ज प्रकरणाचा भांडाफोड केला. या ना त्या कारणाने उपमुख्यमंत्री एकनाथ शिंदे यांच्या भावाचे नाव या प्रकरणात येत असून त्यांनी उपमुख्यमंत्री पदाचा राजीनामा द्यावा अशी मागणी अंधारे यांनी केली. मुख्यमंत्री देवेंद्र फडणवीस या प्रकरणातील सत्य महाराष्ट्राला सांगणार का? असा सवाल देखील त्यांनी केला.
साताऱ्यातील हे रिसॉर्ट प्रकाश शिंदे यांच्या मालकीचे आहे, तर तेथे असणाऱ्या शेडचा मालक गोविंद सिंदकर. याच्या शेडची चावी ओंकार दिघे याने घेतली अशी माहिती गोविंद याने दिली आहे. याप्रकरणी ओंकार दिघे याला ताब्यात घेऊन सोडून देण्यात आले. का सोडलं हे अजून माहीत नाही, असे सांगून अंधारे म्हणाल्या, या प्रकरणांमध्ये सातारा पोलिसांना का कळवलं नाही. मुंबई पोलीस का गेले? असा सवाल अंधारे यांनी केला.
सुषमा अंधारे म्हणाल्या, 13 डिसेंबर रोजी सावरी गावात कारवाई झाली, सुरुवातीला मुकुंद गावात कारवाई झाली होती. त्याचे धागेदोरे पुण्यात आले. यात राष्ट्रवादी काँग्रेस अजित पवार गटाचा पदाधिकारी विशाल मोरे याला ताब्यात घेतले होते, त्याची चौकशी सुरू आहे. त्याच्या चौकशीतून सावरी गावाची माहिती मिळाली. या गावात पोलिसांचे पथक पोहोचले. मी स्वतः सावरी गावात जाऊन आले. आणि हातात काही धक्कादायक माहिती मिळाली. हे कोयनेचे बॅकवॉटर आहे, इथे स्विमिंग टॅक तयार होत आहे. रिसॉर्ट होत आहे, इथून जवळ असणाऱ्या पत्राच्या शेडमध्ये कारवाई करण्यात आली. इथे 75 लाख खर्च करून रस्ता तयार करण्यात आला. इथे गाव नाही, माणूस नाही तर या शेडला जोडणारा रस्ता का तयार करण्यात आला, असा सवाल सुषमा अंधारे यांनी हातातील फोटो दाखवत उपस्थित केला.
या रिसॉर्टमध्ये 7 ते 8 रूम बांधून तयार आहेत, इतर अमेनिटीज तयार होत आहेत, इथे डस्टर गाडी आहे. या कारवाईत 45 किलो ड्रग्ज सापडले. या ड्रग्जची किंमत 145 कोटी एवढी आहे असे अंधारे म्हणाल्या. ड्रग्ज माफियाविरोधात मी सातत्याने आवाज उठवतेय, त्यामुळे माझ्या जिवाला धोका निर्माण होऊ शकतो, त्यामुळे मुख्यमंत्र्यांनी माझ्या सुरक्षेची काळजी घ्यावी अशी विनंती त्यांनी केली.
सुषमा अंधारे यांनी केले सवाल
रणजीत शिंदे हा एकनाथ शिंदे गटाचा तालुका प्रमुख आहे, एकनाथ शिंदे ज्या गावाचे आहेत त्या गावचा हा सरपंच आहे. या सगळ्या संबंधाने काही गोष्टी समोर आल्या. रणजीत शिंदे कुठे आहे,? त्याचं नेमकं काय झालं? रणजीत शिंदे याने हे हॉटेल का चालवावे, त्याचा काय संबंध असे सवाल अंधारे यांनी उपस्थित केले.
प्रकाश शिंदे यांनी ठाण्यातून 2017 साली त्यांनी नगरसेवक पदाची निवडणूक लढवली होती. पोलिसांच्या रेकॉर्डवर आलेली गोष्ट अशी की रिसॉर्टमध्ये 3 लोकं तेथे वास्तव्य करत होती. कायम नजर अब्बाज सय्यद, हबीजूल फकरूल इस्लाम (रा. लहरीघाट, जिल्हा मोरीगाव, आसाम) आणि तिसरे नाव आहे राजीकूल खलीलूल रहमान अशी त्यांची नावे असून ती या शेडमध्ये कशी आली? त्यांनी इकडे कुणी आणले? यातील काही बांगलादेशी असल्याचेही म्हटले जात आहे, असेही सुषमा अंधारे म्हणाल्या. तसेच त्यांची नावे एफआयआरमध्ये का नाहीत? पोलिसांनी ओंकार डिगे याला का सोडले? असा सवालही सुषमा अंधारे यांनी केला.
पोलीस अधीक्षकांनी माहिती लपवली
साताऱ्याचे पोलीस अधीक्षक तुषार दोषी यांनी ही माहिती लपवली. ही लोकं कोण आहेत, याची माहिती त्यांनी दिली आहे. या शेडमध्ये काय काम चालायचं. स्थानिक लोकांनी सांगितल्याप्रमाणे, ही लोकं भारतीय नसावीत. त्यांच्या चेहऱ्याची ठेवणं वेगळी दिसते. या तीन लोकांना जेवण प्रकाश शिंदे यांच्या मालकीच्या हॉटेलमधून जात होते. या तीन कामगारांना या पंचतारांकित हॉटेलमधील जेवण कसे परवडत होते? अर्थात ही माहिती पोलिसांच्या तपासातील आहे. तरी त्यांची नावे एफआयआरमध्ये का नाहीत.
सावरी येथील या हॉटेलचे नाव तेजयश असून प्रकाश शिंदे यांच्या मुलांची नावं तेज आणि यश अशीच आहेत. कदाचित त्यावरून या हॉटेलला हे नाव दिले असावे. ओंकार डिगे याचा पोलिसांनी कसून तपास करावा, त्याचे आंतरराष्ट्रीय ड्रग्ज रँकेटशी संबंधित आहे का? हेही पोलिसांनी तपासावे, अशी मागणीही सुषमा अंधारे यांनी केली.
