कोरेगाव भीमा ऐतिहासिक विजयस्तंभ अभिवादन कार्यक्रमासाठी गुरुवारी होणारी गर्दी विचारात घेता, तसेच परिसरात कायदा व सुव्यवस्था राखण्यासाठी पुणे ग्रामीण पोलिसांनी कडेकोट बंदोबस्त तैनात केला आहे. ठिकठिकाणी वॉच टॉवर, ड्रोन अन् सीसीटीव्ही बसविण्यात आले असून, या माध्यमातून कोरेगाव भीमा येथे निगराणी ठेवण्यात येणार आहे.
ग्रामीण पोलीस अधीक्षक संदीप सिंह गिल यांनी मंगळवारी पत्रकार परिषदेत ही माहिती दिली. यावेळी स्थानिक गुन्हे शाखेचे पोलीस निरीक्षक अविनाश शिळीमकर उपस्थित होते. कोरेगाव भीमा येथील विजयस्तंभास अभिवादन करण्यासाठी दरवर्षी 1 जानेवारीला देशभरातील अनुयायी उपस्थिती लावतात. त्यामुळे येथे लाखोंची गर्दी होते. या पार्श्वभूमीवर परिसरात कायदा व सुव्यवस्था राखण्यासाठी पोलिसांकडून बंदोबस्ताची आखणी करण्यात आली आहे. गर्दीचे नियोजन करण्यासाठी तसेच तपासणीची सर्व तयारी पूर्ण झाली आहे. यंदा विजयस्तंभ अभिवादनासाठी गतवर्षीच्या तुलनेत अधिक गर्दी होण्याचा पोलिसांचा अंदाज आहे. त्यादृष्टीने सर्व तयारी करण्यात आली असून वाहनांना पार्किंग , वाहतूक बदल आदींचे नियोनज करण्यात आले आहे. बंदोबस्तासाठी वरिष्ठ अधिकाऱ्यांसह जवळपास पाच हजार कर्मचारी असणार आहेत. तसेच, अग्निशमन दल, रुग्णवाहिका व एनडीआरएफ पथके सुसज्ज ठेवण्यात आलेली आहेत.
…इथे असेल पार्किंगची व्यवस्था
कोरेगाव भीमा येथे येणाऱ्या अनुयायांसाठी मोठय़ा प्रमाणात पार्किंगचे नियोजन करण्यात आले आहे. वक्फ बोर्ड पार्ंकग 200, टोरंटो पार्किंग 160 आणि इनामदार पार्ंकग इथे 40 मिनीबस बसतील, असे नियोजन आहे. याशिवाय ठिकठिकाणी मोकळ्या जागेवर पार्क होणाऱ्या वाहनांच्या ठिकाणी पोलिसांचा बंदोबस्त असणार आहे.
कोरेगाव भिमा परिसरात सुरक्षेच्या पार्श्वभूमीवर चोख बंदोबस्त राहणार आहे. ड्रोन तसेच सीसीटीव्हींची यंत्रणा कार्यरत राहणार असून नागरिकांसाठी ठिकठिकाणी पार्ंकगची व्यवस्था करण्यात आली आहे.
z संदीप सिंह गिल, पोलीस अधीक्षक, पुणे ग्रामीण
