इंडिगोच्या वैमानिकाला ज्येष्ठ अभिनेते सत्यराज यांचा एक आकाशातच झालेली एक भेट अविस्मरणीय ठरली. इंडिगोचा एक वैमानिक ज्येष्ठ अभिनेते सत्यराज यांच्या समोरासमोर आला तेव्हा त्याच्या आनंदाला उधाण आले. सत्यराज हे ‘बाहुबली’ चित्रपटातील ‘कटप्पा’ या भूमिकेसाठी विशेष ओळखले जातात. अभिनेता सत्यराज हे इंडिगोच्या एका विमानातून प्रवास करत असताना, आपली ड्युटी संपवून गणवेशात असलेल्या त्या वैमानिकाला त्यांच्या शेजारीच जागा मिळाली. भारतीय चित्रपटसृष्टीतील एका अत्यंत प्रतिष्ठित व्यक्तिरेखेला प्रत्यक्ष पाहून तो वैमानिक खुश झाला होता.
View this post on Instagram
हेमंत नायडू या वैमानिकाने या सुखद भेटीला एका इन्स्टाग्राम व्हिडिओद्वारे टिपले आहे. या व्हिडिओमध्ये पायलटने सर्वात प्रसिद्ध प्रश्नाने व्हिडीओची सुरुवात केली. पायलट म्हणाला, ” ‘कटप्पाने बाहुबलीला का मारले?’ हा प्रश्न विचारण्याची संधी तुम्हाला कधी मिळाली आहे का? मला मात्र ती संधी मिळाली.
एखाद्या पत्रकार परिषदेत नाही, चित्रपटाच्या सेटवरही नाही, तर जमिनीपासून ३५,००० फूट उंचावर, आकाशात! माझे विमान चालवण्याचे कर्तव्य संपताच, मी खुद्द त्या व्यक्तीच्या—श्री. सत्यराज यांच्या—बाजूलाच बसलो होतो. आम्ही त्यांच्या चित्रीकरणाच्या वेळापत्रकाबद्दल, त्यांच्या शिस्तप्रियतेबद्दल आणि प्रामाणिकपणाबद्दल, तसेच वयाच्या ७१ व्या वर्षीही ते आपल्यापैकी बहुतेकांपेक्षा किती अधिक तंदुरुस्त आहेत, याबद्दल गप्पा मारल्या. त्यांनी तर एक वैमानिक म्हणून माझ्या कामाच्या वेळापत्रकाबद्दलही चौकशी केली आणि मला आठवण करून दिली की ‘आरोग्य हीच खरी संपत्ती’ आहे. तिथे कसलाही बडेजाव किंवा स्टारडम नव्हता, केवळ निखळ नम्रता होती,” असे नायडू यांनी या व्हिडिओमध्ये म्हटले आहे.
