आमिर खान आणि किरण राव झाले विभक्त, 15 वर्षाच्या संसारानंतर घेतला घटस्फोट

बातमी शेअर करा :
सामना फॉलो करा

बॉलिवूडचा मिस्टर परफेक्शनिस्ट आमिर खान आणि त्याची पत्नी किरण राव विभक्त होणार आहेत. 15 वर्ष संसार केल्यानंतर दोघे घटस्फोट घेणार आहेत. दोघांनी एका संयुक्त पत्रकाद्वारे याची घोषणा केली. यामुळे चाहत्यांना धक्का बसला आहे.

15 वर्ष आम्ही एकमेकांसोबत आनंदाने काढले आणि प्रत्येक क्षणाचा आनंद लुटला. आमचे नाते विश्वास, सन्मान आणि प्रेमाच्या छायेत बहरले. आता आम्ही आयुष्यात नवा अध्याय सुरू करणार असून तो पती-पत्नी प्रमाणे नाही तर पालक आणि एकमेकांच्या कुटुंबियाप्रमाणे असेल. आम्ही काही दिवस आधीच वेगळे होण्याचा निर्णय घेतला होता. आम्ही मुलगा आझादचे पालक असणारच असून संयुक्तपणे त्याला मोठे करू, असे पत्रकात नमूद करण्यात आले आहे.

आम्ही वेगळे होत असलो तरी पाणी फाउंडेशनसह अनेक प्रोजेक्ट्सवर सोबत काम करत राहू. आम्हाला समजून घेतल्याबद्दल आमच्या मित्रांचे, कुटुंबियांचे आभार. त्याच्या पाठिंब्याशिवाय आम्ही या निर्णयापर्यंत पोहोचू शकलो नसतो. आमचे सर्व शुभचिंतक या निर्णयाकडे शेवट नाही तर एका नव्या प्रवासाची सुरुवात म्हणून पाहतील अशी आशा आहे, असेही या पत्रकात दोघांनी म्हंटले आहे.

आमिर खान आणि किरण राव यांची पहिली भेट ‘लगान’ चित्रपटाच्या सेटवर झाली होती. त्यावेळी किरण राव असिस्टंट डायरेक्टर होती. येथेच दोघात प्रेमाचे अंकुर फुटले आणि 2005 साली त्यांनी लग्न केले. दोघांना आझाद नावाचा एक मुलगा देखील आहे.