गेल्या महिन्याभरापासून पडलेल्या पावसामुळे सर्वत्र दाणादाण उडाली आहे आज जिल्ह्यातील पाझर तलाव शेततळे तुडुंब भरून वाहू लागले आहेत त्यातच शेतीमध्ये सुद्धा मोठ्या प्रमाणावर पाणी अनेक ठिकाणी झाल्यामुळे ओला दुष्काळाचे संकट जिल्ह्यावर घेऊन ठेपले आहे. गेल्या काही दिवसांपासून सातत्याने होत असलेल्या पावसामुळे नगर जिल्ह्यात आता ओल्या दुष्काळाचे संकट निर्माण झाले आहे. कमी अधिक प्रमाणात खरिपातील बहुतांश पिकांचे नुकसान झाले असून शेतकरी मोठ्या अडचणीत आले आहेत. शेतात पिके हातातोंडाशी येऊनही पावसामुळे ती हिरावली जात आहेत.
जिल्ह्यामध्ये मागील वर्षी सरासरी अवघा 70 टक्के पाऊस झाला होता. अल्प पावसामुळे जिल्ह्यात भिषण दुष्काळी परिस्थिती निर्माण झाली. त्यामुळे पाणी-चारा टंचाईला शेतकऱ्यांना तोंड द्यावे लागले. चारा टंचाईमुळे जनावरांना जगवण्यासाठी छावण्यांचा आधार घ्यावा लागला. त्यातच यंदा जून महिन्याच्या अखेरीस मान्सुनचे आगमन झाल्यानंतर जिल्ह्यात सर्वदूर पाऊस झाल्यामुळे शेतकऱ्यांना दिलासा मिळाला होता. यंदा जून ते सप्टेंबर महिन्यात जिल्ह्यातील दक्षिण भागातील काही तालुक्यातील भाग वगळता बहुतांश भागात अपेक्षित पाऊस झाला होता. ऑक्टोबर महिन्याच्या सुरुवातीला दक्षिण भागामध्येही पावसाने हजेरी लावली. मात्र, त्यानंतर सातत्याने जोरदार पाऊस झाल्यामुळे हातातोंडाशी आलेल्या पिकांचे मोठ्या प्रमाणात नुकसान झाले आहे. शेतात पावसाचे पाणी साचत असल्यामुळे शेतमाल सडण्याची प्रक्रिया होत आहे. त्यामुळे बाजारपेठेमध्ये शेतकऱ्यांच्या उत्पादनाला अपेक्षित किंमत मिळत नसून शेतकरी आर्थिक संकटात सापडला आहे.
पिकाचे तातडीने पंचनामे करा – जिल्हाधिकारी
ऑक्टोबरपासून जिल्ह्यात मोठ्या प्रमाणात पाऊस पडत असून पावसामुळे शेतामध्ये उभ्या असलेल्या पिकांचे मोठ्या प्रमाणात नुकसान झाल्याचे लोकप्रतिनिधी, शेतकरी यांच्याकडून जिल्हा प्रशासनाला कळवण्यात येतेय. त्यामुळे शेती पिकांचे नुकसानीचे पंचनामे करण्यासाठी पथके स्थापन करावीत, व पिकांच्या नुकसानीचे पंचनामे तातडीने करून त्याचा अहवाल सादर करा, असे निर्देश जिल्हाधिकारी राहुल द्विवेदी यांनी जिल्हा अधीक्षक कृषी अधिकारी व तहसिलदारांना दिले आहेत. याबाबत त्यांनी संबंधितांना पत्र पाठवले आहे. शेतकरी व लोकप्रतिनिधी यांच्याकडून शेतीपिकांचे पंचनामे करण्याची मागणी करण्यात येत आहे. अतिवृष्टीमुळे नुकसान झालेल्या सर्वच पिकांची शेतकऱ्यांना नुकसान भरपाई मिळण्यासाठी तातडीने पंचनामे करणे आवश्यक आहेत. तसेच ज्या शेतकऱ्यांनी शेती पिकांचा पिक विमा उतरविला आहे, अशा शेतकऱ्यांच्या पिकांचे नुकसान झाल्यास त्यांनी संबंधित विमा कंपनीस कळवावे, यासाठी कृषी विभागाने मार्गदर्शन करावे, असेही या पत्रामध्ये स्पष्ट करण्यात आले आहे.
पाऊस विक्रमाच्या दिशेने
जिल्ह्यामध्ये यंदा 30 ऑक्टोबरपर्यंत तब्बल सरासरी 156 टक्के पावसाची नोंद झाली आहे. गेल्या पाच वर्षांची आकडेवारी पाहता जून ते ऑक्टोबर याकाळात सर्वात जास्त पाऊस हा 2017 मध्ये पडला आहे. 2017 मध्ये जिल्ह्यात सरासरी 162 टक्के पावसाची नोंद झाली होती. यंदाच्या वर्षी हा विक्रम मोडण्यासाठी अजून सरासरी सहा टक्के पावसाची आवश्यकता आहे. 1 जून ते 30 ऑक्टोबर याकाळात जिल्ह्यात सर्वात जास्त पाऊस हा अकोले तालुक्यात पडला असून या तालुक्यात सरासरी 308 टक्के पावसाची नोंद झाली आहे. तर, सर्वात कमी पाऊस हा कर्जत तालुक्यात पडला असून या तालुक्यात सरासरी 104 टक्के पावसाची नोंद झाली आहे.
