सामना प्रतिनिधी । पाथर्डी
पालिका हद्दीत असलेल्या बाजाराचा कर गोळा करण्याचा ठेका घेणाऱ्या ठेकेदाराचा ठेका बुधवारी झालेल्या पालिकेच्या सर्वसाधारण सभेत रद्द करण्यात आला. या ठेकेदाराला करार न करताच काम सुरू करण्याचे आदेश देणाऱ्या तत्कालीन कर विभागाच्या लिपीकावर ठेकेदाराकडून 2 लाख 19 हजार रुपयांची वसुली करण्याचा निर्णयही या वेळी घेण्यात आला. याच बैठकीत सत्ताधारी आघाडीच्या नगरसेविका दीपाली बंग यांनी गाळमिश्रित पाण्याच्या बाटल्या मुख्याधिकऱ्यांना भेट म्हणून दिल्याने सत्ताधारी आघाडीतच ऑल इज वेल नसल्याचे स्पष्ट झाले.
पालिका सभागृहात बुधवारी सर्वसाधारण सभेचे आयोजन करण्यात आले होते. अध्यक्षस्थानी नगराध्यक्ष डॉ. मृत्युंजय गर्जे होते. या वेळी रोजबाजाराचा ठेका घेणाऱ्या ठेकेदाराचा विषय चर्चेला घेण्यात आला. हा ठेका आप्पासाहेब बोरुडे यांनी घेतला होता. बोरुडे यांच्याशी कोणताही लेखी करार करण्यात आलेला नव्हता. बोरुडे यांचेकडून पालिकेला 2 लाख 19 हजार रुपये बाकी असून बोरुडे यांनी या पूर्वीच पालिकेशी पत्रव्यवहार करत मला कर गोळा करण्यासाठी पालिकेने सुविधा पुरवल्या नाहीत. काही अतिक्रमणधारकांना पालिकेने उतारे दिल्याने या व्यावसायिकांनी कर दिला नसल्याने ठेक्याची रक्कम कमी करावी अशी मागणी केली होती. या विषयावर चर्चा झाल्यानंतर सभागृहाने एकमताने बोरुडे यांचा ठेका रद्द करत कोणताही करार न करता बोरुडे यांना काम सुरू करण्याचे आदेश देणाऱ्या तत्कालीन कर विभागावर बोरुडे यांच्याकडून अपेक्षित असलेली 2 लाख 19 हजार रुपयांची वसुली करण्याचा ठरावही संमत करण्यात आला. याच बैठकीत नगरसेवक प्रवीण राजगुरू यांनी कामगारांना कामे सांगितली तर कामबंद आंदोलने केली जातात हे चुकीचे असल्याचे सांगितल्यानंतर सर्वच नगरसेवकांनी राजगुरू यांच्या म्हणण्याला दुजोरा देत वेगळा विचार करावा लागेल असा पवित्रा घेतला. तर विरोधी आघाडीचे नगरसेवक बंडू बोरुडे यांनी पालिकेच्या मालकीच्या वाहनांवर जी. पी. एस. यंत्रणा बसवण्याचा निर्णय घेतेवेळी पालिकेच्या मालकीचा जेसीबी कुठे आहे अशी विचारणा केली. तर पालिका हद्दीत रोहयोचा आराखडा तयार करून जनावरांच्या छावण्यांना शासनाने मंजुरी द्यावी असा ठराव सर्वानुमते संमत करण्यात आला.पालिकेने परस्पर विकलेल्या 14 व्यापारी गाळे प्रकरणाची चौकशी करण्याची मागणी सर्वच नगरसेवकांनी केल्यानंतर पुढील बैठकीत या विषयावर चर्चा करण्याचा निर्णय घेण्यात आला.
या वेळी डॉ. गर्जे यांनी पालिकेच्या रिक्त जागेवर अधिकारी नेमणूक करणे व पालिकेला भरीव निधी दिल्याबद्दल पालकमंत्री राम शिंदे व आमदार मोनिका राजळे यांच्या अभिनंदनाचा ठराव मांडला. तो संमत करण्यात आला. या वेळी झालेल्या चर्चेत उपनगराध्यक्ष बजरंग घोडके, नगरसेवक नंदकुमार शेळके,नामदेव लबडे,प्रसाद आव्हाड,अनिल बोरुडे,महेश बोरुडे,मंगल कोकाटे,शारदा हंडाळ,संगीत गटांनी,सुनीता बुचकुल,सविता भापकर,सविता डोमकावळे यांनी सहभाग घेतला. आभार मुख्याधिकरी धनंजय कोळेकर यांनी मानले.
