कोरोनाने IPLची विकेट घेतली, स्पर्धा अनिश्चित काळासाठी स्थगित

एकामागोमाग एक क्रिकेटपटू कोरोनाग्रस्त झाल्याचे समोर आल्याने बीसीसीआयने IPL अनिश्चित काळासाठी स्थगित करण्याचा निर्णय घेतला आहे. स्पर्धेचे चेअरमन ब्रिजेश पटेल यांनी पीटीआयशी बोलताना ही माहिती दिली. ही स्पर्धा आयोजित करण्यासाठी आपण सज्ज असून क्रिकेटपटूंसाठी मजबूत बायो बबल तयार करण्याचा आल्याचा दावाही बीसीसीआयने केला होता. असं असतानाही क्रिकेटपटूंना कोरोनाची लागण होऊ लागली.

तुम्हाला घरापर्यंत सुरक्षित नेण्याची जबाबदारी आमची, बीसीसीआयकडून IPL मधील परदेशी क्रिकेटपटूंना हमी

मंगळवारी सनरायझर्स हैदराबादचा वृद्धीमान साहा आणि दिल्ली कॅपिटल्सचा अमित मिश्रा या क्रिकेटपटूंचे कोरोना रिपोर्ट पॉझिटीव्ह आले आहे. बीसीसीआयने या स्पर्धेत सहभागी झालेल्या संघमालकांशी चर्चा करून पुढे काय करावे याबाबतचे त्यांचे मत मागविले होते. यातील बहुतांश जणांनी स्पर्धा रद्द करावी अशी भूमिका घेतल्याचे कळते आहे.

कोरोनाच्या दुसऱया लाटेने ‘आयपीएल’च्या बायो‘बबल’चा फुगा फोडला आहे. कोलकाता, चेन्नई या संघांतील दोघांना आणि नवी दिल्लीतील स्टेडियममधील ग्राऊंडस्मनना कोरोनाची लागण झाली होती.  कोरोनामुळे रॉयल चॅलेंजर्स बंगळुरू व कोलकाता नाईट रायडर्स यांच्यामध्ये सोमवारी होणारा सामनाही पुढे ढकलण्यात आला होता. दुसरीकडे दिल्ली कॅपिटल या संघालाच क्वॉरंटाईन होण्याचे आदेश बीसीसीआयने दिले होते.

कोलकाता नाईट रायडर्ससह चेन्नई सुपरकिंग्स आणि नवी दिल्लीतील स्टेडियम येथे कोरोनाचा शिरकाव झाला होता. चेन्नई सुपरकिंग्स संघाचे सीईओ काशी विश्वनाथन, गोलंदाजी प्रशिक्षक लक्ष्मीपती बालाजी व बस क्लीनर यांचा रविवारचा रिपोर्ट पॉझीटीव्ह आला होता. नवी दिल्ली स्टेडियममधील पाच ग्राऊंडस्मन यांचाही रिपोर्ट पॉझीटीव्ह आला आहे.

परदेशी क्रिकेटपटूंना धास्ती

ऍड्रय़ू टे, ऍडम झाम्पा, केन रिचर्डसन या ऑस्ट्रेलियन क्रिकेटपटूंनी आयपीएल अर्धवट सोडून मायदेशात प्रयाण केले आहे. आता हिंदुस्थानातील वाढत्या कोरोनाचा धसका आयपीएलमध्ये सहभागी होत असलेले परदेशी क्रिकेटपटू, पंच व समालोचकांनीही घेतलेला आहे. ऑस्ट्रेलियन सरकारने 15 मेपर्यंत हिंदुस्थानातून येणारी विमाने बंद केली आहेत. यावर आयपीएलमध्ये समालोचन करीत असलेले मायकेल स्लेटर यांनी सोशल साईटवर टीका केली आहे.

वरुण, संदीप कोरोना पॉझिटीव्ह

कोलकाता नाईट रायडर्स संघातील वरुण चक्रवर्ती व संदीप वॉरियर या दोघांचा कोरोना रिपोर्ट पॉझिटीव्ह आला आहे. या दोघांचाही गेल्या चार दिवसांमधील तिसऱया फेरीचा रिपोर्ट पॉझिटीव्ह आला आहे. इतर खेळाडूंचा कोरोना रिपोर्ट निगेटीव्ह आला असला तरी या संघाच्या पुढच्या लढतींवर याचा परिणाम होण्याची शक्यता आहे.

आपली प्रतिक्रिया द्या