लो करलो बात… कहानी में आणखी एक ट्विस्ट, तुमची इच्छा असेल तर मागे हटते! रेणू शर्माची माघार

बातमी शेअर करा :
सामना फॉलो करा

राष्ट्रवादीचे नेते सामाजिक न्यायमंत्री धनंजय मुंडे यांच्यावर बलात्काराचा आरोप करत रेणू शर्मा नावाच्या महिलेने महाराष्ट्राच्या राजकारणात सनसनाटी निर्माण केली खरी. मात्र हे प्रकरण स्वतःवरच बुमरँग होताच या महिलेने ‘तुमची इच्छा असेल तर मागे हटते’ असे म्हणत या प्रकरणातून माघार घेण्याची तयारी दर्शविली आहे.


जर मी चुकीची असेन तर मग इतके सारे लोक आतापर्यंत पुढे का येऊ शकले नाहीत? मी माघार घेतली तरीदेखील माझा मला स्वतःला अभिमान असेल, याचे कारण संपूर्ण महाराष्ट्रात मी एकटी मुलगी लढत होते.

तसे पाहिले तर मी कोणत्याही पक्षाचे नाव घेतलेले नाही आणि आता मला हटवण्यासाठी आणि खाली पाडण्यासाठी इतक्या लोकांना यावे लागत आहे. आता तुम्हाला जे काही लिहायचे आहे ते बसा आणि लिहा, असे शर्मा यांनी दुसऱया एका ट्विटमध्ये म्हटले आहे.

कायद्यापुढे कोणताही मंत्री मोठा नाही!

धनंजय मुंडे यांच्यावरील आरोपांची सध्या चौकशी सुरू आहे. यामधून जे काही निष्पन्न होईल त्यानुसार संबंधितांवर कारवाई केली जाईल. कायदा पुणासोबतही भेदभाव करणार नाही. कायद्यापुढे कोणताही मंत्री किंवा संत्री मोठा नाही. कायद्यासमोर सर्व समान असतात, असे गृहमंत्री अनिल देशमुख म्हणाले.

मुंडे आरोप प्रकरणातील तक्रारदार रेणू शर्मा यांनी ट्विट करत तुमची सर्वांची इच्छा असेल तर मी माघार घेते, असे म्हटले आहे. एक काम करा, तुम्ही सर्वांनीच मिळून निर्णय घ्या. कोणतीही माहिती नसताना जे मला ओळखतात ते देखील चुकीचे आरोप करत असतील तर सर्वांनी मिळून निर्णय घ्या, असे त्यांनी म्हटले आहे.

पक्ष मुंडेंच्या पाठीशी

धनंजय मुंडे यांना चौकशी पूर्ण होण्याआधीच दोषी ठरवणे योग्य होणार नाही. पोलीस चौकशीत ते दोषी ठरत नाहीत तोपर्यंत पक्ष मुंडेंच्या पाठीशी असल्याचे राष्ट्रवादीचे प्रदेश अध्यक्ष जयंत पाटील यांनी स्पष्ट केले.

मुंडे हे आमच्या पक्षातील ओबीसी समाजातील नेते आहेत. कोणत्याही समाजाचा, जाती-धर्माचा नेता असला तरी सगळा पक्ष त्याच्या पाठीमागे उभा राहतो, हा आमच्या पक्षात आणि भाजपमध्ये एक फरक आहे, असेही ते म्हणाले.