तिजोरीत खडखडाट असल्याने महायुती सरकार आता उत्पन्नाचे नवनवीन पर्याय शोधत आहे. तातडीने महसूल वाढवता यावा म्हणून आज सरकारने तळीरामांच्या खिशाला भोक पाडले. विक्रीवरील कर वाढवून दारू महाग करून टाकली. सरकारच्या या निर्णयामुळे यापुढे देशी दारूच्या क्वार्टरसाठी 80 रुपये तर महाराष्ट्र मेड क्वार्टरसाठी 148 रुपये मोजावे लागणार आहेत. विदेशीप्रेमींची क्वार्टर या वाढीनंतर 360 रुपये झाली आहे. मद्याचे दर वाढवल्यामुळे दरवर्षी सरकारी तिजोरीत 14 हजार कोटींची भर पडणार आहे.
राज्य उत्पादन शुल्क विभागाने महसूल वाढीसाठी सुचवलेल्या उपाययोजनांना मंत्रिमंडळ बैठकीत मान्यता देण्यात आली. महसूल वाढविण्यासाठी स्थापन केलेल्या सचिवस्तरीय अभ्यासगटाने उपाययोजना सुचवल्या होत्या. त्यानुसार देशी बनावटीचे एक लिटर विदेशी मद्य बनवण्यासाठी होणाऱया खर्चावर उत्पादन शुल्क 3 पटीवरून साडेचार पट करण्यात आले. देशी मद्यावरील उत्पादन शुल्क लिटरमागे 180 वरून 205 रुपये केले.
महाराष्ट्र मेड लिकर… नव्या ब्रॅण्डला मान्यता
महाराष्ट्रात आता महाराष्ट्र मेड लिकरही (एमएमएल) उपलब्ध होणार आहे. सरकारने देशी आणि विदेशी मद्याव्यतिरिक्त महाराष्ट्र मेड लिकर (एमएमएल) या धान्यापासून बनवण्यात येणाऱया विदेशी मद्याचा नवीन प्रकार तयार करण्यासही मान्यता दिली आहे. महाराष्ट्रातील मद्य उत्पादकच या मद्याची निर्मिती करू शकणार आहेत. त्यासाठी त्यांना या नव्या ब्रॅण्डची नोंदणी करून घ्यावी लागणार आहे. एमएमएलची किंमत 148 रुपये क्वार्टर म्हणजेच 180 मी.ली. असणार आहे.
