
कर्जत तालुक्यातील माजी सैनिक आता पोलिसांच्या बरोबरीने करोनाविरुद्ध लढा देणार आहेत. पोलिसांसोबत प्रत्यक्ष बंदोबस्तासाठी ते रस्त्यावर उतरणार आहेत. बंदोबस्ताबाबत माजी सैनिकांच्या सहभागाविषयी सोमवारी कर्जत पोलिस स्टेशनमध्ये बैठक पार पडली. त्यानंतर माजी सैनिक मंगळवारपासून माजी सैनिक बंदोबस्तामध्ये सहभागी होणार आहेत, अशी माहिती आजी-माजी सैनिक संघटनेचे अध्यक्ष भाऊसाहेब रानमाळ यांनी दिली. या सर्व माजी सैनिकांना पोलिस अधिकारी पदाचा दर्जा देण्यात आला आहे, अशी ओळखपत्रे देखील त्यांना पोलिस निरीक्षक सुनील गायकवाड यांनी दिली.
लॉकडाऊनच्या काळात पोलिसांच्या खांद्याला खांदा देऊन अनेक स्वयंसेवी संघटना, आरोग्य सेवक कार्यरत आहेत. पोलिसांचे देशातील योगदान पाहता तालुक्यातील आजी माजी सैनिक संघटना करोना वॉरियर्सच्या रुपाने उतरली आहे. या लढाईमध्ये शहारातील रस्त्यांवर पोलिसांच्या बरोबर बंदोबस्त करणार आहे. संपूर्ण तालुक्यात सुमारे 45 माजी सैनिक कार्यरत राहणार आहेत. यामध्ये पोलिसांबरोबर बंदोबस्त करणे, चेकपोस्ट नेमून दिलेल्या ठिकाणी तपासणी करणे, नागरिकांना मदत करणे आदी जबाबदार्या माजी सैनिकांनी घेतल्या आहेत. त्याप्रमाणे मंगळवारपासून तत्काळ माजी सैनिक पोलिसांबरोबर करोनाविरोधी लढाईत सहभागी होणार आहेत. विशेष म्हणजे सध्या सैनिक म्हणून नोकरीत असणारे व तूर्त सुट्टीवर असणारे आजी सैनिक संतोष पाटोळे, शहाजी मदने, व नोकरीमधील सुनील काळे, जालिंदर जमदाडे हे सुद्धा या लढ्यात सहभागी होणार आहेत.
याच पार्श्वभूमीवर कर्जत पोलिस स्टेशन येथे माजी सैनिक संघटनेची पोलिस प्रशासनाबरोबर महत्त्वाची बैठक पार पडली. सदर बैठकीमध्ये कर्जत पोलिस स्टेशनचे पोलिस निरीक्षक सुनील गायकवाड, सहपोलिस निरिक्षक मानेब व नगरपंचायतचे मुख्य कार्यकारी अधिकारी गोविंद जाधव यांनी या वेळी मार्गदर्शन केले. बैठकीला कर्जत नगरपंचायतची उपनगराध्यक्ष नामदेव राऊत, कर्जत आजी-माजी सैनिक संघटनेचे अध्यक्ष भाऊसाहेब रानमाळ, सतीश पावणे, गंगाराम बनसोडे, सुधीर कर्पे, भाऊसाहेब आगवण, प्रमोद बनकर, संभाजी कदम, अंकुश म्हस्के यांसह अनेक आजी माजी सैनिक उपस्थित होते.
































































