म्हाडा व झोपु योजनेतील काही सदनिका विकायच्या आहेत. दोन्ही विभागांचे अधिकारी आपले एकदम खास आहेत. त्यांच्या माध्यमातून मुंबईमध्ये तुम्ही स्वतःचे घर घेऊ शकता, अशाप्रकारची चालबाजी करून पद्धतशीर जाहिरातबाजी करून बनावट कागदपत्रे दाखवून अनेकांना लाखो रुपयांचा गंडा घालून पसार झालेला भामटा अखेर नेहरू नगर पोलिसांच्या हाती लागला. पोलिसांनी त्याच्या साथीदारालाही बेड्या ठोकल्या.
प्रीतम ओसवाल असे त्या भामट्याचे नाव आहे. ओसवाल तसेच त्याच्या टोळीतल्या संतोष दळवी, सिंग व इम्रान या चौघांनी गतवर्षी एका तरुणाला म्हाडामधून स्वस्तात सदनिका मिळवून देतो असे खोटे सांगून तसेच विश्वास बसावा याकरिता घराची बोगस कागदपत्रे दाखवून 7 लाख 56 हजार रुपयांचा गंडा घातला होता. याप्रकरणी त्या तरुणाने दिलेल्या तक्रारीवरून या चौघांविरोधात कुर्ल्याच्या नेहरू नगर पोलीस ठाण्यात गुन्हा दाखल करण्यात आला होता. अशा प्रकारचे अन्य दोन गुन्हेदेखील दाखल झाले होते. पैसे घेतल्यापासून चौघेही आरोपी पसार झाले होते.
मोबाईल व ठावठिकाणा बदलून ते राहत असल्याने त्यांना शोधणे जिकिरीचे झाले होते. अखेर वरिष्ठ निरीक्षक युसूफ सौदागर यांच्या मार्गदर्शनाखाली उपनिरीक्षक शाहिन देसाई तसेच गणेश उगले, सूर्यवंशी, कसबे, तुषार आणि वानखेडे हे पथक शोध घेत असताना कमी किंमतीत घर देण्याच्या बहाण्याने नागरिकांना फसविणाऱ्या टोळीचा म्होरक्या प्रीतम ओसवाल हा कर्जतमध्ये सापडला. तो हाती लागल्यानंतर सिंग याला बेड्या ठोकण्यात आल्या. चौकशीत या आरोपींनी नेहरूनगर, एमआयडीसी, बोरीवली आदी ठिकाणी 15 हून अधिक लोकांची घराच्या नावाने फसवणूक केल्याची कबुली दिली आहे. त्यांचे अन्य दोन साथीदार दळवी व इम्रान यांचा शोध सुरू आहे.
अशी करतात बनवाबनवी…
सिंग हा इस्टेट दलालाचे काम करतो. त्याचे म्हाडातील काही अधिकारी ओळखीचे असल्याने त्यांच्या माध्यमातून कुठे म्हाडा तसेच झोपु योजनेतील सदनिका आहेत त्याची माहिती तो घेतो. मग त्या सदनिकांचे फोटो काढून ते ओसवालला देतो. ओसवाल 90 एकर्स डॉट कॉम तसेच प्रसारमाध्यमांद्वारे सदरच्या सदनिका कमी किंमतीत विकत मिळतील अशी जाहिरातबाजी करतो. ती जाहिरात पाहून कोणी घर घेण्यास इच्छा व्यक्त केल्यास दळवी व सिंग स्वतः अधिकारी म्हणून सामोरे जायचे व सदनिकेचे बोगस म्हाडाचे कागदपत्र संबंधितांना दाखवतात. मग ओसवाल मध्यस्ती असल्याचे भासवून नागरिकांकडून पैसा घ्यायचा. मग ते सर्व आपापसात पैसे वाटून घ्यायचे.
