आंध्र प्रदेशातील सावत्र वडिलांकडून होत असलेल्या लैंगिक अत्याचारांपासून वाचण्यासाठी घरातून पळून गेलेल्या 17 वर्षीय तरुणीवर ओडिशातील बेरहामपूर शहरात सामूहिक बलात्कार झाल्याची धक्कादायक घटना उघडकीस आली आहे. या प्रकरणी ओडिशा पोलिसांनी दोन जणांना अटक केली असून एका अल्पवयीन मुलाला ताब्यात घेण्यात आले आहे.
पोलिसांच्या माहितीनुसार, 29 मार्च रोजी या तरुणीला गुंगीचे औषध देऊन बेशुद्ध करण्यात आले आणि त्यानंतर दोन आरोपींनी तिच्यावर बलात्कार केला. स्थानिक नागरिकांकडून माहिती मिळाल्यानंतर पोलिसांनी तातडीने कारवाई करत तरुणीची सुटका केली. बेरहामपूरच्या पोलिसांनी सांगितले की, या प्रकरणात तीन जणांना ताब्यात घेण्यात आले असून, त्यापैकी 23 आणि 19 वर्षांचे दोन आरोपी अटकेत आहेत, तर 15 वर्षीय मुलाला बालसुधारगृहात पाठवण्यात आले आहे.
या घटनेप्रकरणी सामूहिक बलात्कारासह विविध कलमांखाली गुन्हा दाखल करण्यात आला असून, बाललैंगिक अत्याचार प्रतिबंधक (POCSO) कायद्यांतर्गतही कारवाई करण्यात आली आहे. याशिवाय, पीडित तरुणीच्या सावत्र वडिलांविरुद्ध आंध्र प्रदेशात स्वतंत्र गुन्हा दाखल करण्यात आला आहे. त्यांच्या लैंगिक अत्याचारामुळेच ती घरातून पळून गेल्याचे पोलिसांनी सांगितले.
तपासात उघड झाले की, आंध्र प्रदेशातील कडप्पा जिल्ह्यातील ही तरुणी 24 मार्च रोजी ‘प्रशांती एक्सप्रेस’ने बेरहामपूर रेल्वे स्थानकात पोहोचली होती. वडिलांच्या निधनानंतर तिच्या आईने दुसरे लग्न केले होते आणि सावत्र वडील तिच्यावर लैंगिक अत्याचार करत असल्याने ती घर सोडून निघाली होती, असे तिने पोलिसांना सांगितले.
बेरहामपूर येथे पोहोचल्यानंतर काही वेळ ती रेल्वे स्थानकावर राहिली आणि नंतर जवळील एका चहाच्या टपरीवर काम मिळवले. तेथे तिची एका स्थानिक मुलाशी ओळख झाली. 29 मार्च रोजी त्या मुलाने तिला आपल्या मित्रांकडे नेले. प्राथमिक तपासात समोर आले की, तरुणीला पेयामध्ये गुंगीचे औषध देण्यात आले, ज्यामुळे ती बेशुद्ध झाली. त्यानंतर दोन आरोपींनी तिच्यावर बलात्कार केला, तर अल्पवयीन मुलाने त्यांना मदत केल्याचा आरोप आहे. नंतर स्थानिक नागरिकांना ती संशयास्पद अवस्थेत आढळून आली आणि त्यांनी पोलिसांना माहिती दिली.
पोलिसांनी तरुणीला जिल्हा बालकल्याण समितीसमोर (CWC) हजर केले असून तिची वैद्यकीय तपासणी करण्यात आली आहे. समितीच्या निर्देशानुसार सध्या तिला बालसंगोपन केंद्रात ठेवण्यात आले आहे.
