मराठी माणसांमध्ये आत्मसन्मानाचा धगधगता अंगार पेटवणारे हिंदुहृदयसम्राट, शिवसेनाप्रमुख बाळासाहेब ठाकरे यांना गुरुवंदना अर्पण करण्यासाठी गुरुवारी ‘मातोश्री’ निवासस्थानी शिवसैनिकांची रीघ लागली. गुरुपौर्णिमेनिमित्त महाराष्ट्राच्या कानाकोपऱ्यातून निष्ठावंत शिवसैनिक आले आणि शिवसेनाप्रमुखांच्या आसनापुढे नतमस्तक झाले. यावेळी शिवसेना पक्षप्रमुख उद्धव ठाकरे यांनी शिवसैनिकांच्या मानवंदनेचा स्वीकार केला. आपण सर्वजण बाळासाहेबांनी दिलेला गुरुमंत्र लक्षात ठेवून कार्य करू, अशी भावना उद्धव ठाकरे यांनी यावेळी व्यक्त केली.
शिवसेनाप्रमुख बाळासाहेब ठाकरे यांच्या धगधगत्या विचारांनी मराठी माणसाच्या जीवनाचा उद्धार केला. आजही त्यांचे विचार तमाम मराठीजनांना आणि शिवसैनिकांना नवचैतन्य देतात. न्याय्य हक्कांसाठी संघर्षाचे बळ देत असतात. त्याच जाणिवेतून दरवर्षीप्रमाणे यंदाही गुरुपौर्णिमेच्या दिवशी असंख्य शिवसैनिक ‘मातोश्री’ निवासस्थानी पोहचले आणि शिवसेनाप्रमुखांना गुरुवंदना अर्पण केली. सकाळपासून ‘मातोश्री’वर शिवसैनिकांची रीघ लागली होती.
शिवसेनाप्रमुखांच्या आसनावर चाफ्याची फुले अर्पण
सुरुवातीला शिवसेना पक्षप्रमुख उद्धव ठाकरे यांच्यासह पक्षाचे नेते, पदाधिकारी आणि शिवसैनिकांनी शिवसेनाप्रमुखांना आदरांजली अर्पण केली. शिवसेनाप्रमुखांना आवडती चाफ्याची फुले त्यांच्या आसनावर वाहून सर्वजण नतमस्तक झाले. बाळासाहेब आणि माँसाहेब सौ. मीनाताई ठाकरे यांच्या तसबिरीलाही चाफ्याचा पुष्पहार अर्पण करण्यात आला.
शिवसेना नेते, खासदार अरविंद सावंत, शिवसेना नेते चंद्रकांत खैरे, राजन विचारे, उपनेते विनोद घोसाळकर, आमदार नितीन देशमुख, शिवसेना सचिव सूरज चव्हाण, सुधीर साळवी, उपनेते अमोल कीर्तिकर, गुरुनाथ खोत, उपनेत्या विशाखा राऊत, माजी आमदार विलास पोतनीस, आमदार रमेश कोरगावकर, माजी महापौर श्रद्धा जाधव, गोरेगाव-दिंडोशी विभागप्रमुख शालिनी सावंत, अनिल कोकीळ, सुजाता शिंगाडे, आदींनी मातोश्रीवर हजर राहून शिवसेनाप्रमुखांना वंदन केले. सध्या विधिमंडळाचे अधिवेशन सुरू असल्याने शिवसेना आमदारांनी सकाळीच ‘मातोश्री’ निवासस्थान गाठले आणि शिवसेनाप्रमुखांच्या आसनापुढे नतमस्तक होऊन दैनंदिन कामकाजाची सुरुवात केली.
शिवतीर्थावरील स्मृतिस्थळावरही पुष्पांजली
अनेक ज्येष्ठ शिवसैनिकांनी ते शालेय जीवनापासून दरवर्षी गुरुपौर्णिमेला ‘मातोश्री’वर येत असल्याचे सांगत शिवसेनाप्रमुखांच्या जुन्या आठवणींना उजाळा दिला. तरुण व महिला शिवसैनिकांचीही उपस्थिती लक्षणीय होती. यावेळी शिवसेना व शिवसेनाप्रमुखांच्या जयघोषाने संपूर्ण परिसर दुमदुमला. शिवतीर्थावरील शिवसेनाप्रमुखांच्या स्मृतिस्थळावरही मोठय़ा संख्येने शिवसैनिक आणि शिवसेनाप्रेमी नागरिकांनी पुष्पांजली वाहून वंदन केले.
बाळासाहेब हेच आपले सर्वांचे दैवत, गुरू आहेत – उद्धव ठाकरे
‘मातोश्री’वर आलेल्या शिवसैनिक आणि शिवसेनाप्रेमी नागरिकांचे उद्धव ठाकरे यांनी स्वागत केले. त्यांना नमस्कार करण्यासाठी शिवसैनिक पुढे सरसावले तेव्हा उद्धव ठाकरे विनम्रपणे म्हणाले की, आपण सर्व एक आहोत. मला शाल, पुष्पगुच्छ नको. तुमच्याकडून प्रेमाचा ‘जय महाराष्ट्र’ पुरेसा आहे. तुमच्या सर्वांच्या प्रेमाचा स्वीकार करतो. हिंदुहृदयसम्राट शिवसेनाप्रमुख बाळासाहेब ठाकरे हेच आपले सर्वांचे दैवत, गुरू आहेत. आपण सर्व त्यांच्यासमोर नतमस्तक होऊया. शिवसेनाप्रमुखांनी दिलेल्या शिकवणीचे पालन करूया, त्यांचे ज्वलंत विचार सदैव स्मरणात ठेवून काम करूया, असे आवाहन उद्धव ठाकरे यांनी शिवसैनिकांना केले.
