उवा झाल्या की त्याचा थेट परिणाम हा केसांवर होतो. विशेष म्हणजे केसात उवा होणे ही लाजीरवाणी बाब आहे. अनेकजण उवा झाल्यावर विविध तेल, शॅम्पू आणि साबणाचा वापर करतात. मात्र, तरी देखील त्यातून सहज सुटका होत नाही. यासाठी काही घरगुती उपाय घेऊन आलो आहोत. ज्यामुळे तुमच्या डोक्यातील उवा रातोरात्र पळून जाण्यास मदत होईल.
उवा कशा असतात ?
उवा हा एक प्रकारचा परजीवी आहे. जो मानवाच्या रक्तावर जगतो. ती एका रात्रीत असंख्य अंडी घालते आणि आपली संख्या वाढवते. महत्त्वाचे म्हणजे एका व्यक्तीच्या डोक्यात उवा असतील तर त्या दुसऱ्या व्यक्तीच्या डोक्यात सहज जातात आणि त्यांचा प्रसार करतात.
डोक्यातील उवांची लक्षणे-
टाळूला खाज येणे
केसात हुळहुळणे
टाळू, मान किंवा खांद्यावर पुरळ येणे
यावर तुम्ही काही घरगुती उपाय केल्यास फायदा होऊ शकतो.
कडुलिंब
उवा झालेली व्यक्ती कडुलिंबाचा वापर करु शकते. कारण कडुलिंबात बॅक्टेरियाविरोधी आणि जंतुनाशक शक्ती असते. जे जिवाणूशी लढण्यास मदत करते. याकरता एक कप कडुलिंबाची पाने उकळून त्याची पेस्ट तयार करा आणि ती पेस्ट केसांना लावा. हे केसांना दोन तास लावून ठेवा. नंतर कोमट पाण्याने चांगले धुवा. हे उवांचे पुनरुत्पादन रोखते आणि त्यापासून सुटका होण्यास मदत होते.
ऑलिव्ह ऑईल
ऑलिव्ह ऑईलमुळे केसातील उवा गुदमरतात. त्यामुळे त्यांना केसांना लावणे लाभदायक ठरते. ऑलिव्ह ऑईल केसांना लावावे आणि केसात शॉवर कॅप घालावी. यामुळे उवा गुदमरुन मरतात. त्या केसातून काढून टाकण्यासाठी दुसऱ्या दिवशी केसाला कंगवा करा. यामुळे त्या बाहेर पडतात.
अ‍ॅपल सायडर व्हिनेगर
केसात उवांवर अ‍ॅपल सायडर व्हिनेगर उत्तम पर्याय आहे. याकरता सर्वप्रथम १ चमचा खोबरेल तेल आणि अ‍ॅपल सायडर व्हिनेगर एकत्र करा आणि ते केसांना चांगले लावून घ्या. त्यानंतर रात्रभर केसांमध्ये शॉवर कॅप घाला. सकाळी उठल्यावर केस कंगव्याने विंचरा. केसातील उवा बाहेर पडण्यास मदत होईल.
टी ट्री ऑईल
हर्बल टी ट्री ऑईल हे एक नैसर्गिक किटकनाशक आहे. जे उवांना उपटून टाकण्यास मदत करते. हे तेल खोबरेल तेलात मिसळून डोक्याला चांगले लावा आणि दोन तासाने शॅम्पूने केस स्वच्छ धुवा.
लसूण
दहा ते पंधरा लसणाच्या पाकळ्या चांगल्या वाटून घ्या. त्यात लिंबाचा रस मिक्स करा आणि ही तयार पेस्ट केसांना लावा. नंतर कोमट पाण्याने केस स्वच्छ धुवून घ्या आणि नंतर कंगव्याच्या सहाय्याने केस विंचरा. यामुळे उवा मरण्यास मदत होईल.
खोबरेल तेल आणि कापूर
कापराचा वास उवांच्या डोळ्यांना झोंबतो आणि त्या मरतात. याकरता खोबरेल तेल आणि कापूर एकत्र करा आणि ते केसांना लावा. यामुळे उवा मरण्यास मदत होते.
कांद्याचा रस
कांद्यामुळे सल्फर असते त्यामुळे उवा मरतात. याकरता कांद्याच्या रसात लिंबाचा रस घाला आणि ते तयार पाणी केसांना लावा. यामुळे उवा मरण्यास मदत होईल.
