गांजा, मेफेड्रोन, कोकेन, चरसनंतर आता ठाण्यात हायब्रीड गांजाची तस्करी सुरू असल्याचा पर्दाफाश गुन्हे शाखेच्या अमली पदार्थविरोधी पथकाने केला आहे. पोलिसांच्या नजरेत धूळ फेकून ही आंतरराष्ट्रीय टोळी आपले जाळे पसरवत असून या टोळीतील एका तस्कराच्या पोलिसांनी मुसक्या आवळल्या आहेत. सुमित कुमावत (२१) असे या तस्कराचे नाव असून रहिवासी आहे. त्याच्याकडून पोलिसांनी २ कोटी ३७ लाख ४० हजार रुपये किमतीचा २ किलो ३७४ ग्रॅम विड्स म्हणजेच हायब्रीड गांजा जप्त करण्यात आला आहे. या कारवाईमुळे सिंडिकेट चालवणाऱ्यांचे कंबरडे मोडले आहे.
मुंब्रा येथील जुन्या टोलनाक्याजवळील सिम्बॉयोसिस शाळेजवळ एक जण अमली पदार्थाची विक्री करण्यासाठी येणार असल्याची माहिती गुन्हे शाखेचे अमली पदार्थविरोधी पथकाचे अमोल देसाई यांना मिळाली. त्यानुसार वरिष्ठ पोलीस निरीक्षक राहुल म्हस्के यांनी वरिष्ठ अधिकाऱ्यांच्या मार्गदर्शनाखाली सापळा रचून सुमित कुमावतला ताब्यात घेतले. त्याची झडती घेतली असता पोलिसांना २ किलो ३७४ ग्रॅम हायब्रीड गांजा आणि एमडीएमए (मिथिलेन डीऑक्सी मेथाफेटामाईन) १९ टॅब्लेट्स सापडल्या. पोलिसांनी त्याची कसून चौकशी केली असता त्याचे मुंबई व राज्यातील विविध ठिकाणांवरील ड्रग्ज पेडलर्सच्या संपर्कात असल्याचे समोर आले आहे. तसेच तो आंतरराष्ट्रीय तस्करी टोळीतील सक्रिय सदस्य असल्याचा संशय पोलिसांनी वर्तवला आहे. त्याने हा एवढ्या मोठ्या प्रमाणात हायब्रीड गांजा कुठून व कोणाला विक्री करण्यासाठी आणला होता याचा तपास सुरू असल्याची माहिती गुन्हे शाखा उपायुक्त अमरसिंह जाधव यांनी दिली.
