जगातील सर्वात मोठी चिप बनवणारी कंपनी इंटेल पुन्हा एकदा कपातीचे धोरण राबवणार आहे. इंटेल जुलै 2025 पासून उत्पादन युनिटमधील 15 ते 20 टक्के कर्मचाऱ्यांना आता घरचा रस्ता दाखवणार आहे. या निर्णयामुळे तब्बल 10,000 हून अधिक जणांच्या नोकऱ्या जाणार आहेत. ही कपात कंपनीच्या इतिहासातील सर्वात मोठी मानली जात आहे.
या कपातीचा परिणाम हा प्रामुख्याने इंटेलच्या फाउंड्री विभागावर होणार आहे. या विभागात कंपनीच्या 15 फॅब प्लांट्सचा मोठ्या प्रमाणावर समावेश आहे. यामध्ये फॅक्टरी तंत्रज्ञांपासून ते नवीन चिप्स डिझाइन करणाऱ्या संशोधकांपर्यंत सर्वांचा समावेश आहे. म्हणजेच ही कपात अगदी कनिष्ठांपासून ते वरिष्ठांपर्यंत अशा सर्व विभागांमध्ये केली जाणार आहे.
मुख्य म्हणजे इंटेलने गेल्यावेळी कपात करताना स्वेच्छा निवृत्तीचा पर्याय समोर ठेवला होता. परंतु यंदा मात्र इंटेल कोणालाही स्वेच्छा निवृत्तीचा पर्याय देणार नाही. तसेच कंपनी आता प्रत्येकाच्या कामगिरीवर काटेकोरपणे लक्ष ठेवून कपातीचा निर्णय घेणार आहे. याबरोबरीने ज्यांची आता कंपनीला गरज नाही अशांनाही कपातीला सामोरं जावं लागणार आहे. कंपनी म्हणते की हा निर्णय खूप कठीण आहे, परंतु सध्याच्या आर्थिक परिस्थिती लक्षात घेता हा निर्णय घेणे खूपच आवश्यक आहे.
मार्च 2025 मध्ये आलेले सीईओ लिप-बू टॅन कंपनीत मोठा बदल आणत आहेत. त्यांचा असा विश्वास आहे की, कमी लोकांकडून अधिक आणि चांगले काम करवुन घेतले जाऊ शकते. एप्रिलमध्ये त्यांनी इंटेलमधील कर्मचाऱ्यांमध्ये 20 टक्के कपात करण्याची घोषणा केली आणि आता ही कारवाई फाउंड्री विभागात सुरू करण्यात येणार आहे. ऑगस्ट 2024 मध्ये इंटेलने 15,000 नोकऱ्यांवर गदा आणली होती. तसेच 2025 च्या सुरुवातीला 20% अधिक कर्मचाऱ्यांना कमी करण्याची योजना होती. त्यानंतर आता तिसरी कपात ही प्रामुख्याने कंपनीतील सर्वात महत्त्वाच्या विभागांमध्ये करण्याचे योजले आहे.
तांत्रिक टीममधील प्रगत तंत्रज्ञान, लिथोग्राफी मशीन आणि संशोधनात गुंतलेले आहेत त्यांना सध्या धोका नाही. परंतु ज्यांचे प्रकल्प बंद झाले आहेत त्यांना त्यांच्या नोकऱ्या मात्र जाणार आहेत.
