ओडिशातील पुरी येथील जगन्नाथ मंदिरातील पुजारी जगन्नाथ दीक्षित यांची हत्या करण्यात आली आहे. ते मंदिरात मुख्य पुजारी म्हणून काम पाहत असे. पुजाऱ्याच्या हत्येची घटना सीसीटीव्ही कॅमेऱ्यात कैद झाल्याचे आता सांगण्यात येत आहे. सीसीटीव्ही मध्ये एक व्यक्ती पुजाऱ्याचा मृतदेह दाराबाहेर फेकताना दिसत आहे. पुजाऱ्याचा मृतदेह पतजोशीच्या घरासमोर रक्ताने माखलेला आढळला. त्यामुळेच सध्या या परिसरात तणावाचे वातावरण असून, कडक सुरक्षा व्यवस्था ठेवण्यात आलेली आहे. दिवसाढवळ्या झालेल्या या हत्येमुळे आता चांगलीच खळबळ उडाली आहे.
दरम्यान सीसीटीव्ही कॅमेऱ्याचे फुटेज समोर आले आहे. यामध्ये एक माणूस दीक्षितचा मृतदेह फेकताना दिसत आहे. सीसीटीव्ही फुटेजमध्ये दीक्षितचा मृतदेह फेकताना दिसणारा व्यक्ती पतजोशी असल्याचा दावा स्थानिकांनी केला. त्याने मंदिरातील पुजाऱ्याला मारले कारण त्याने त्याचे पैसे परत मागितले होते. मोठ्या प्रमाणात पोलिस बंदोबस्त तैनात असताना दिवसाढवळ्या वरिष्ठ पुजाऱ्याची हत्या झाल्याने सर्वांनाच धक्का बसला आहे.
सदर घटनेची माहिती मिळताच पुरी शहराचे डीएसपी (पोलीस उपअधीक्षक) प्रशांत कुमार साहू यांनी शहर पोलीस ठाण्याच्या आयआयसीसह घटनास्थळी पोहोचून तपास सुरू केला. एक वैज्ञानिक पथकही घटनास्थळी पोहोचले आणि तपासणीसाठी नमुने गोळा केले. तर दीक्षित यांचा मृतदेह शवविच्छेदनासाठी पुरी जिल्हा मुख्यालय रुग्णालयात (DHH) पाठवण्यात आला.
या गुन्ह्यावर प्रतिक्रिया देताना पुरीचे एसपी विनीत अग्रवाल म्हणाले की, ही हत्या वैयक्तिक शत्रुत्वातून झाली आहे. सीसीटीव्ही फुटेज गोळा करून ते तपास प्रक्रियेत समाविष्ट करण्यात आले आहे. तपास पूर्ण झाल्यानंतरच घटनेचे खरे कारण समोर येईल, असे त्यांनी सांगितले.
