पुणे जिल्ह्यातील जुन्नर तालुक्यामध्ये बिबट्यांचा वावर वाढला असून रविवारी सकाळी थरार पहायला मिळाला. येथील प्रकाश दत्तात्रय डोंगरे यांच्या घरामागील पटांगणामध्ये बिबट्या लपून बसला होता. बिबट्याची चाहूल लागताच त्यांनी तातडीने वनविभागाशी संपर्क साधला.
वनविभागाने पथकासह घटनास्थळी धाव घेत बिबट्याला पकडण्याचा प्रयत्न केला. मात्र जखमी अवस्थेतील बिबट्या गांगरून गेला आणि पळून गेला. दोन वेळा हुलकावणी दिल्यानंतर हा बिबट्या डोंगरे यांच्या घरामागे असलेल्या विहिरीमध्ये अडकला. तिथेच वनविभागाने त्याला जेरबंद केले आहे. हा बिबट्या जखमी असून त्याच्यावर उपचार करून त्याला मुक्त केले जाईल, अशी माहिती वनविभागाच्या अधिकाऱ्यांनी दिली.
