Video – मुंबईकरांना ऐन हिवाळ्यात पावसाळ्याचा अनुभव; विजांच्या कडकडाटासह पावसाची हजेरी

बातमी शेअर करा :
सामना फॉलो करा

मुंबईकर साखरझोपेमध्ये असताना बाहेर विजांच्या कडकडाटासह आणि ढगांच्या गडगडाटासह पाऊस सुरू होता. मुंबईसह उपनगरांमध्ये आणि पालघर, नवी मुंबई, ठाणे, कल्याण शहरामध्ये अवकाळी पावसाने हजेरी लावली. त्यामुळे मॉर्निंग शिफ्टला जाणाऱ्या चाकरमान्यांना भर हिवाळ्यामध्ये स्वेटरऐवजी छत्र्या शोधाव्या लागल्या.

हवामान विभागाने मुंबईसाठी ऑरेज अलर्ट जारी केला होता. हा अंदाज खरा ठरला असून रविवारी सकाळी अनेक भागांमध्ये मुसळधार पाऊस कोसळला. त्यामुळे रस्त्यावर अनेक ठिकाणी पाणी साचले.

 

View this post on Instagram

 

A post shared by Saamana (@saamana_online)

आगामी दोन-दिवस पावसाची शक्यता असल्याने पारा घसरून थंडीचा कडाकाही वाढेल. तसेच पावसामुळे हवेची गुणवत्ताही सुधारणार आहे. पावसामुळे काही भागांमध्ये सकाळच्या सुमारास इंद्रधनुष्यही दिसले.

सिंधुदुर्ग जिल्ह्यातील काही भागांमध्ये सलग दुसऱ्या दिवशी पावसाने हजेरी लावली. कुडाळ, कणकवली, वेंगुर्ले, सावंतवाडी, दोडामार्ग, वैभववाडी तालुक्यात पावसाच्या सरी बरसल्या. अवकाळी पावसामुळे आंबा आणि काजू बागांवर परिणाम होण्याची शक्यता आहे.

दरम्यान, राज्यभरात 25 ते 27 नोव्हेंबर या तीन दिवसांत अनेक भागात मुसळधार पाऊस पडेल असा अंदाज हवामान विभागाने वर्तवला होता. संपूर्ण ऑगस्ट महिना कोरडा गेला. तर सप्टेंबरमध्येही पावसाने म्हणावी तशी हजेरी लावली नाही. त्यानंतर 15 ऑक्टोबरपूर्वीच मान्सूनने महाराष्ट्रातून काढता पाय घेतला. आता नोव्हेंबरच्या शेवटी वरुणराजा अचानक बरसणार आहे. या पावसामुळे गेल्या काही दिवसांपासून खराब असलेली मुंबईची हवा सुधारून धुरके विरेल अशी आशा आहे.

उत्तरेकडे बर्फवृष्टी झाल्यामुळे महाराष्ट्रात अनेक भागांत गारवा आहे. मुंबई, ठाण्यात पहाटेच्या सुमारास थोडा गारवा जाणवत आहे. मात्र आता ऐन हिवाळ्यात राज्यभरात पावसाळ्याचा अनुभव येणार आहे.