मुंबईत सार्वजनिक ठिकाणी उघडय़ावर अस्वच्छता करणारे, थुंकणारे आणि कचरा करणाऱ्यांवर क्लीनअप मार्शलकडून धडक कारवाई सुरू असून गेल्या दहा महिन्यांत तब्बल 1 लाख 45 हजार 438 जणांना दणका देण्यात आला आहे. यामध्ये तब्बल 4 कोटी 20 लाख 2 हजार 612 रुपयांचा दंड वसूल करण्यात आला आहे. या कारवाईसाठी पालिकेने सर्व 24 वॉर्डात 30 क्लीनअप मार्शलची नेमणूक केली आहे. महापालिकेच्या आयटी विभागाने ऑनलाइन अॅपद्वारे दंडात्मक रक्कम वसूल करण्यासाठी सुविधा उपलब्ध करून दिली आहे. यासाठी क्लीनअप मार्शलकडे मोबाईल ब्ल्यूटूथवर चालणारा छोटा प्रिंटर देण्यात आला आहे. या प्रिंटरद्वारे दंडाकरिता स्वतंत्र पावती छापून दिली जात आहे. दंडाची रक्कम ही क्लीनअप मार्शल संस्थेच्या बँक खात्यामध्ये जमा होत आहे. दंडाची अर्धी रक्कम पालिका, तर अर्धी रक्कम पंत्राटदाराला मिळत आहे. हा दंड टाळण्यासाठी मुंबईकरांनी स्वच्छता राखावी, असे आवाहन पालिका प्रशासनाच्या माध्यमातून करण्यात आले आहे.
