मुंढवा येथील 40 हेकर जागेच्या खरेदी-विक्री घोटाळा प्रकरणात अमेडिया कंपनीतील पार्थ पवार यांचा भागीदार आणि मामेभाऊ दिग्विजय पाटील सोमवारी (दि. 15) बावधन पोलिसांसमोर हजर झाला. सकाळपासून त्याची कसून चौकशी करण्यात आली. सायंकाळी उशिरापर्यंत चौकशी सुरू होती.
अमेडिया इंटरप्रायजेस एलएलपी कंपनीचा भागीदार दिग्विजय अमरसिंह पाटील याच्यासह जमीन विक्रीबाबत कुलमुखत्यार पत्र असलेली शीतल तेजवानी आणि दस्त नोंदणी करणारे सहदुय्यम निबंधक रवींद्र तारू या तिघांविरुद्ध बावधन पोलीस ठाण्यात 6 नोव्हेंबर रोजी गुन्हा दाखल करण्यात आला होता. गुन्हा दाखल झाल्यापासून दिग्विजय पाटील पोलिसांसमोर हजर होण्यास टाळाटाळ करीत होता. अखेर सव्वा महिन्यानंतर पाटील स्वतःहून चौकशीसाठी बावधन पोलीस ठाण्यात हजर झाला. सकाळी अकरा वाजता तो पोलीस ठाण्यात आला. पोलीस उपायुक्त विशाल गायकवाड, वरिष्ठ पोलीस निरीक्षक अनिल विभुते यांच्यामार्फत त्याची चौकशी करण्यात आली. जमिन खरेदी-विक्री व्यवहार, दस्त नोंदणी याबाबत पोलिसांनी जबाब घेतला. सायंकाळी उशिरापर्यंत चौकशी सुरू होती, अशी माहिती सहाय्यक पोलीस निरीक्षक अशोक डोंगरे यांनी दिली.
तारूच्या पोलीस कोठडीत वाढ
बावधन पोलीस ठाण्यातील दाखल गुह्यात कागदपत्रांची तपासणी केली असता या प्रकारातील दस्त नोंदणी रवींद्र तारू अधिकारात झालेली असल्याचे स्पष्ट झाले होते. त्यानुसार तारूला भोर येथील राहत्या घरातून 7 डिसेंबर रोजी अटक केली होती. त्याच्या पोलीस कोठडीची मुदत संपल्याने त्याला आज न्यायालयात हजर केले असता 19 डिसेंबरपर्यंत पोलीस कोठडीत वाढ करण्याचे आदेश न्यायालयाने दिले.
