नेपालला हिंदू राष्ट्र घोषित करण्याची आणि राजशाही पुनर्स्थापित करण्याची मागणी जोर धरत आहे. यातच राष्ट्रीय प्रजातंत्र पक्ष (आरपीपी) आणि आरपीपी-नेपाल यांसह राजशाही समर्थक गटांनी काठमांडू येथील नारायण चौर परिसरात तीव्र आंदोलन करण्यात आलं. या आंदोलनादरम्यान प्रतिबंधित क्षेत्रात प्रवेश करण्याचा प्रयत्न केल्याच्या आरोपाखाली पोलिसांनी नेपालचे माजी गृहमंत्री कमल थापा यांच्यासह सुमारे सहा जणांना अटक केली आहे. आंदोलनकर्त्यांनी जोपर्यंत राजशाही पुनर्स्थापित होत नाही, तोपर्यंत आपले आंदोलन सुरू ठेवण्याचा निर्धार व्यक्त केला आहे.
राष्ट्रीय प्रजातंत्र पार्टीच्या नेतृत्वाखाली काठमांडूत झालेल्या या निदर्शनांमध्ये हजारो समर्थकांनी सहभाग घेतला. आंदोलनकर्त्यांनी माजी राजा ज्ञानेंद्र शाह यांच्या फोटोचे बॅनर हातात धरले होते. नारायण चौर येथील या आंदोलनादरम्यान पोलीस आणि आंदोलकांमध्ये काही ठिकाणी तणावाची परिस्थिती निर्माण झाले होती.
याबाबत माहिती देताना काठमांडू व्हॅली पोलिसांचे प्रवक्ते अपिल बोहोरा म्हणाले की, राजेशाहीचे कट्टर समर्थक आणि आरपीपीचे अध्यक्ष राजेंद्र लिंगदेन हे आंदोलनाचे नेतृत्व करत होते. आंदोलकांनी सुरक्षा घेरा तोडून पंतप्रधानांचे अधिकृत निवासस्थान असलेल्या बालुवातारकडे जाण्याचा प्रयत्न केला. यानंतर पोलिसांनी त्यांना ताब्यात घेतले.
