सामना प्रतिनिधी । नगर
नगर जिल्ह्यात कमी पावसामुळे दुष्काळी स्थिती असून या दुष्काळाची तीव्रता वाढत आहे. जिल्ह्यात ठिकठिकाणी पाण्यासोबतच जनावरांच्या चार्‍याचीही टंचाई निर्माण झाली आहे. नगर जिल्ह्यातील 11 तालुक्यांतील चारा जवळपास संपला आहे. त्यामुळे जनावरांना चार्‍यासाठी चारा छावण्यांत दाखल केले जात आहे. नगर जिल्ह्यात दुष्काळी स्थिती पाहता चारा टंचाई होणार याबाबत प्रशासनास जाणीव होती. त्यामुळे प्रशासनाने चारा बियाण्यांचे वाटप केले होते. त्यामुळे जिल्ह्यात काही प्रमाणात चारा उपलब्ध झाला आहे. नगर जिल्ह्यातील संगमनेर, राहुरी आणि नेवासा या तीन तालुक्यात काही प्रमाणात चारा शिल्लक आहे.
यंदा कमी पावसामुळे राज्यात दुष्काळ पडला आहे. राज्यातील बहुतांश ठिकाणी दुष्काळ आहे. पाणीटंचाई निर्माण झाली आहे. जनावरांच्या चार्‍याचाही प्रश्‍न निर्माण झाला आहे. अशा स्थितीत प्रशासनाकडून उपाययोजना केल्या जात आहेत. नागरिकांना टँकरद्वारे पाणीपुरवठा केला जात आहे. जनावरांसाठी चारा छावण्या सुरू केल्या आहेत. या छावण्यांतून जनावरांना खाद्य व पाण्याची व्यवस्था करण्यात येत आहे. नगर जिल्ह्यात दुष्काळामुळे पाणी व चारा टंचाई निर्माण झाली आहे. पावसाने पाठ फिरविल्याने मागील खरीप व रब्बी या दोन्ही हंगामास फटका बसला. पाण्याअभावी समाधानकारक पेरण्या झाल्या नाहीत. चारा पिकांचेही प्रमाण कमी राहिले. त्याचा परिणाम चारा टंचाई होण्यात झाला आहे. यंदाच्या उन्हाळ्यात जनावरांसाठी चारा उपलब्ध करणे कठीण झाले आहे. राज्यातच अशी परिस्थिती निर्माण झाल्याने चारा छावण्या सुरू करण्याचा निर्णय घेण्यात आला. त्यानुसार या छावण्यांत जनावरांची देखभाल करण्यात येत आहे. जनावरांना खाद्य व पाण्याची व्यवस्था केली आहे.
या व्यतिरिक्त चारा पिकांसाठी प्रशासनाने याआधी नियोजन केले होते. दुष्काळामुळे उन्हाळ्याचा चारा टंचाई होणार याचा अंदाज असल्याने चारा पिके घेण्यासाठी नियोजन करण्यात आले होते. शेतकर्‍यांना शंभर टक्के अनुदानावर बियाणे देण्यात आले आहे. त्यामुळे काही प्रमाणात चारा उपलब्ध झाला आहे. जिल्ह्यातील काही भागात हा चारा जनावरांना दिला जात आहे. मक्याचा चारा दिला जात आहे. असे असले तरी दुष्काळाची तीव्रता मात्र वाढत आहे. त्यामुळे पावसाळा सुरू होईपर्यंत प्रशासनास नियोजन करावे लागणार आहे.
