पंडितजी जुगलबंदीसाठी स्वर्गस्थ झाले आहेत! मुख्यमंत्री उद्धव ठाकरे यांची आदरांजली

बातमी शेअर करा :
सामना फॉलो करा

पंडित जसराज नावाचा तारा संगीत क्षेत्रातून निखळला आहे. त्यांच्या जाण्याने संगीत क्षेत्रात जणू अंधःकार पसरला आहे. स्वर्गीय संगीताचा आनंद पंडितजींनी या भूतलावरील प्रत्येक कणाकणांना दिला. आता ते जुगलबंदीसाठी स्वर्गस्थ झाले आहेत, अशा शब्दांत मुख्यमंत्री उद्धव ठाकरे यांनी पंडित जसराज यांना आदरांजली अर्पण केली आहे.

पंडितजी गायक म्हणून जितके थोर होते तितकेच मनुष्य म्हणूनही महान होते. त्यांच्या चेहऱयावरील प्रसन्नता, हास्य हे त्यांच्या गळय़ातून निघणाऱया सुरांइतकेच दिलखुलास होते. पृथ्वीवरील सातही महाद्विपांवर सुरांची बरसात करणारे ते एकमेव गायक होते. त्यांच्या सन्मानार्थ एका ग्रहाचे नाव नासाने ‘पंडित जसराज’ असे ठेवले. हा या देशाचा बहुमानच म्हणायला हवा, असे मुख्यमंत्र्यांनी शोकसंदेशात म्हटले आहे.

मुख्यमंत्री पुढे म्हणतात, पंडितजी हे जुगलबंदीचे बादशहाच होते. जिथे जिथे सूर्याची किरणे पोहोचत होती तेथे तेथे पंडितजींचे सूर पोहचले होते. अण्टार्क्टिकाच्या दक्षिण ध्रुवावरही पंडितजींचे गायन झाले होते. आकाश आणि जमिनीचा कण न् कण त्यांच्या सुरांच्या बरसातीत न्हाऊन निघाला आहे. पंडितजी फक्त शरीराने आपल्यातून गेले. त्यांची गायकी, त्यांचे सूर हे अनंत काळपर्यंत आपल्या हृदयात राहतील. त्यांचा जन्म हरयाणात झाला असला तरी त्यांचे संगीताचे कार्य घडविण्यात महाराष्ट्राचा हातभार आहे. पंडितजी महाराष्ट्राचे जावई होते. शिवसेनाप्रमुख बाळासाहेब ठाकरे यांचा पंडितजींशी ऋणानुबंध होता. मलाही पंडितजींचा स्नेह लाभला. महाराष्ट्राच्या कोटय़वधी जनतेतर्फे मी त्यांना विनम्र आदरांजली वाहतो आणि त्यांच्यापुढे नतमस्तक होत आहे, अशा भावना मुख्यमंत्री उद्धव ठाकरे यांनी व्यक्त केल्या.