सलग डय़ुटी आणि तब्येतीच्या कारणास्तव उपमुख्यमंत्री एकनाथ शिंदे यांचे विमान उडवण्यास पायलटने नकार दिला आणि जळगाव विमानतळावर बराचवेळ नाटय़ घडले. दरम्यान, नंतर त्याच पायलटने हे विमान मुंबईला आणले.
शिंदे जळगाव येथून मुंबईला येणार होते. मात्र, ऐनवेळी पायलटने विमान उड्डाणास नकार दिला. 12 तासांहून अधिक डय़ुटी झाल्याने तसेच तब्येत बरी नसल्याने मला विमान नेणे शक्य नाही, असे त्याने सांगितले. त्यामुळे शिंदे आणि त्यांचा लवाजमा अडकून पडला. त्यानंतर मंत्री गिरीश महाजन आणि गुलाबराव पाटील तिथे पोहोचले. ते विमान कंपनीशी बोलले. पायलटची डॉक्टरांकडून तपासणी करण्यात आली. डय़ुटी संपलेली असल्याने नव्याने परवानगी घेण्यात आली. त्यानंतरच त्याच पायलटसह विमान निघाले.
