गेल्या 15 वर्षात जवळपास सर्वच राजकीय पक्षांमध्ये फिरून आलेले आमदार प्रताप पाटील चिखलीकर यांनी मोठा गौप्यस्फोट केला आहे. मी स्वत:हून पक्ष सोडला नाही, तर तडजोडीसाठी मला राष्ट्रवादी काँग्रेस अजित पवार गटात पाठवण्यात आले, असे विधान प्रताप पाटील चिखलीकर यांनी मुख्यमंत्री देवेंद्र फडणवीस यांचे नाव घेऊन केले.
प्रताप पाटील चिखलीकर आणि काँग्रेस सोडून भाजपमध्ये गेलेल्या अशोक चव्हाण यांच्यातून विस्तवही जात नाही हे सर्वश्रुत आहे. दोघांमधील विळ्या-भोपळ्याचे वैर अनेकदा जाहीर सभांमधूनही समोर आले होते. लोकसभा निवडणुकीआधी अशोक चव्हाणांनी भाजपमध्ये प्रवेश केला आणि त्यानंतर त्यांना राज्यसभेवर पाठवण्यात आले. याच अशोक चव्हाण यांना देवेंद्र फडणवीस यांनी लीडर नाही तर डीलर असे म्हटले होते, याची आठवणही चिखलीकर यांनी करून दिली. तसेच ज्या पक्षात आहे ते पक्ष वाढवण्याची जबाबदारी असून नांदेडमध्ये आपल्यावर भुंकण्यासाठी काही लोक ठेवण्याची टीकाही त्यांनी नाव न घेता केली.
मुख्यमंत्र्यांना जालन्यात येण्यास लाज वाटते का? विराट मोर्चातील शेतकऱ्यांचा सवाल
चिखलीकरांच्या कोलांटउड्यांचा उतिहास
- 2004 मध्ये काँग्रेसने तिकीट नाकारल्यानंतर प्रताप पाटील चिखलीकरांनी अपक्ष म्हणून निवडणूक लढवली. या निवडणुकीत मतदारांनी त्यांना विजयी केले.
- 2009 च्या निवडणुकीत त्यांना लोकभारती या पक्षाने उमेदवारी दिली. मात्र मतदारांनी त्यांना झिडकारले.
- 2011 मध्ये प्रतापराव राष्ट्रवादी काँग्रेसमध्ये आले.
- 2014 मध्ये राष्ट्रवादी काँग्रेस सोडून ते शिवसेनेत आले. या निवडणुकीत मतदारांनी त्यांना भरघोस मते दिली.
- 2018 मध्ये शिवसेना सोडून प्रतापराव भाजपवासी झाले. 2019 मध्ये भाजपने त्यांना लोकसभेचे तिकीट दिले. काँग्रेसचे प्रदेशाध्यक्ष असलेल्या अशोक चव्हाणांचा त्यांनी पराभव केला.
- 2024 मध्ये आमदारकीच्या अपेक्षेने त्यांनी अजित पवारांच्या राष्ट्रवादीत जाण्याचा निर्णय घेतला.
