एल्फिन्स्टन पुलामुळे बाधित होणाऱ्या दोन इमारतींमधील रहिवाशांना येत्या महिन्याभरात नव्या घराच्या चाव्या मिळणार आहेत. नुकतीच एमएमआरडीएच्या अधिकाऱ्यांनी दक्षिण मुंबईतील म्हाडाच्या 119 घरांची पाहणी केली असून त्यातील 83 घरांची या रहिवाशांच्या पुनर्वसनासाठी निवड केली. दादर, प्रभादेवी, वडाळा, लोअर परळ या भागात ही घरे असून रहिवाशांना घरांचे वाटप करण्याची जबाबदारी एमएमआरडीएवर असणार आहे.
वरळी-शिवडी कनेक्टरसाठी एल्फिन्स्टन पूल जमीनदोस्त करण्यात येणार आहे. या पुलाचे पिलर उभारण्यासाठी हाजी नुरानी आणि लक्ष्मी निवास या दोन इमारती बाधित होणार आहेत. लक्ष्मी निवास या इमारतीत 60 तर हाजी नुरानी या इमारतीत 23 रहिवाशी आहेत. ‘याच परिसरात आम्हाला घरे द्या… आमच्या पुनर्वसनाचा प्रश्न मार्गी लावल्याशिवाय एल्फिन्स्टन पूल तोडू देणार नाही’, अशी भूमिका रहिवाशांनी घेतली होती. अखेर रहिवाशांच्या आंदोलनापुढे सरकार झुकले. बाधित रहिवाशांचे पुनर्वसन या परिसरात उपलब्ध असलेल्या म्हाडाच्या घरांमध्ये करण्याचे आश्वासन सरकारकडून रहिवाशांना देण्यात आले होते.
म्हाडाच्या मुंबई इमारत दुरुस्ती आणि पुनर्रचना मंडळाने दक्षिण मुंबईतील या परिसरात उपलब्ध असलेल्या 119 घरांची यादी एमएमआरडीएला दिली होती. नुकतीच एमएमआरडीए आणि म्हाडाच्या अधिकाऱ्यांनी संयुक्तरीत्या या घरांची पाहणी केली. त्यातील 83 घरांची निवड एमएमआरडीएने केली आहे. यातील काही घरे चार-पाच वर्षांपासून बंदावस्तेत असल्यामुळे त्याची दुरुस्ती म्हाडामार्फत केली जाणार आहे. महिन्याभरात ही घरे एमएमआरडीएकडे हस्तांतरित केली जातील, अशी माहिती सूत्रांनी दिली.
म्हाडाला 150 कोटींचा महसूल
म्हाडाची ही घरे विखुरलेली असून 350 ते 650 चौरस फुटांची आहेत. या घरांसाठी म्हाडा रेडीरेकनरच्या 110 टक्के दराने एमएमआरडीएकडून पैसे वसूल करणार आहे. दक्षिण मुंबईतील मोक्याच्या ठिकाणी असलेल्या या घरांच्या विक्रीतून म्हाडाच्या तिजोरीत सुमारे 150 कोटी रुपयांचा महसूल जमा होणार आहे.
