देवळात नमस्काराच्या बहाण्याने जायचे, रेकी करायची आणि दानपेटी, घंटा आणि समया चोरायच्या हा नेहमीचा धंदा असलेल्या एका चोरट्यावर पेण पोलिसांनी झडप घातली. या चोरट्याला रेवदंड्याच्या थेरोंडा आगळ्याची वाडी येथून अटक करण्यात आली असून महेश चायनाखवा असे त्याचे नाव आहे.
पेण शहरातील साई मंदिरात चोरीची घटना घडली. चोरट्याने मंदिरातील दोन मोठ्या घंटा आणि समई चोरून नेली होती. या चोरीचा छडा लावण्यासाठी पोलीस उपअधीक्षक गजानन टेम्पो व पोलीस निरीक्षक संदीप बागुल यांच्या मार्गदर्शनाखाली खास दोन पथके तयार करण्यात आली. या पथकाने शहरातील 15 सीसीटीव्ही तपासून पाहिले. त्यात चोर चोरीचा ऐवज घेऊन पनवेलला जाणाऱ्या एसटीत चढताना दिसला.
पोलिसांनी मंदिरात चोरी करणाऱ्या चोरांचा रेकॉर्ड तपासला असता त्यांना रेवदंडा पोलीस ठाण्यात महेश चायनाखवा (रा. थेरोंडा आगळ्याची वाडी) याचा रेकॉर्ड मिळाला. देवळातील किमती वस्तू चोरण्याच्या प्रकरणात महेश 21 मे रोजी तुरुंगातून शिक्षा भोगून आला होता. पेण पोलिसांनी सीसीटीव्हीतील फोटोसोबत त्याचा चेहरा तपासला असता पेणमधील चोरी त्यानेच केली असल्याचे स्पष्ट झाले. याआधी या चोरट्याने वडखळ, दादर (पेण), रोहा, कोलाड, पेण येथील मंदिरांमध्ये दानपेट्या लांबवणे, समया, घंटा चोरल्याचे उघड झाले.
