रशियाने युक्रेनवर आतापर्यंतचा सर्वात मोठा ड्रोन हल्ला केला असून, रविवारी रात्री तब्बल 479 ड्रोन्स आणि 20 क्षेपणास्त्रे डागली आहे. युक्रेनच्या हवाई दलाने दिलेल्या माहितीनुसार, या हल्ल्यात 460 ड्रोन्स आणि 19 क्षेपणास्त्रे यशस्वीपणे नष्ट करण्यात आली. या हल्ल्यामुळे युक्रेनच्या अनेक भागांत नुकसान झाले असले, तरी कोणत्याही मोठ्या जीवितहानीची नोंद झालेली नाही.
युक्रेनच्या रिव्हने शहराचे महापौर ऑलेक्झांडर ट्रेत्याक यांनी या हल्ल्याला युद्ध सुरू झाल्यापासून रिव्हने प्रांतावरील सर्वात मोठा हल्ला असल्याचे म्हटले आहे. रशियाने गेल्या काही आठवड्यांपासून युक्रेनवरील हल्ल्यांची तीव्रता वाढवली आहे, ज्यामुळे रशियाला शांतता चर्चेत रस नसल्याचे युक्रेनचे म्हणणे आहे.
दरम्यान, याआधी युक्रेनने रशियन लष्कराच्या चार हवाई तळांवर ड्रोन हल्ले केले होते. हे हल्ले इतके जबरदस्त आणि अचूक होते की त्यात रशियाच्या अणुबॉम्बचा मारा करणाऱ्या तसेच हेरगिरी करणाऱ्या 41 विमानांच्या क्षणार्धात चिंधड्या उडाल्या, असा दावा करण्यात आला होता. ‘ऑपरेशन स्पायडरवेब’ असे नाव या कारवाईला देण्यात आले होते. 4700 किलोमीटर आत घुसून हे हल्ले करण्यात आले होते.
