नगर जिल्ह्यात गेल्या दोन महिन्यात साखर कारखान्यांनी 35 लाख 63 हजार टन उसाचे गाळप करीत 34 लाख 61 हजार क्विंटल साखरेचे उत्पादन केले आहे. यंदाही गाळपात अंबालिका खासगी कारखाना आघाडीवर असून, या कारखान्याने आतापर्यंत साडेसहा लाख क्विंटल साखर उत्पादन घेतले आहे. सुरुवातीला गाळपाला वेग नव्हता. परंतु गेल्या 15 दिवसांमध्ये सर्व कारखान्यांनी 11 लाख क्विंटल साखर उत्पादन घेतले आहे. आता गाळपाला कमी ऊस उपलब्ध असल्याने गाळप दोन ते तीन आठवड्यात संपण्याचा अंदाज असल्याची माहिती नगरच्या प्रादेशिक सहसंचालक कार्यालयातून देण्यात आली.
उसाचे क्षेत्र कमी असल्याने यंदा गाळपाला कमी ऊस उपलब्ध होत असल्याने कारखान्यांच्या गाळपावर परिणाम होत आहे. जिल्ह्यात 10 सहकारी व 4 खासगी अशा 14 कारखान्यांचे गाळप यंदा सुरू आहे. गेल्या काही वर्षांमध्ये पहिल्यांदा जिल्ह्यातील 9 साखर कारखाने उसाअभावी बंद आहेत. आतापर्यंत सर्व कारखान्यांनी 35 लाख 63 हजार टन उसाचे गाळप करीत 34 लाख 61 हजार 885 क्विंटल साखर निर्मिती केली आहे. पहिल्या दीड महिन्यामध्ये गाळपाला वेग नव्हता. 15 जानेवारीपर्यंत 26 लाख टन उसाचे गाळप होऊन 24 लाख 76 क्विंटल साखर निर्मिती झाली होती. गेल्या 15 दिवसांमध्ये साखर उत्पादन 11 लाख क्विंटलने वाढले आहे. या हंगामात आतापर्यंत गाळप व साखर उत्पादनामध्ये अंबालिका हा खासगी साखर कारखाना आघाडीवरून असून, या कारखान्याने जानेवारीअखेरपर्यंत 6 लाख 98 हजार 590 टन उसाचे गाळप करीत 6 लाख 60 क्विंटल साखर उत्पादन घेतले आहे. दरवर्षी हा कारखाना संपूर्ण हंगामात 10 लाख क्विंटल साखर उत्पादित करतो. उसाची टंचाई असूनही हा कारखाना दुसरीकडून ऊस आणून गाळप करीत आहे. सहकारी कारखान्यांमध्ये थोरात सहकारी कारखान्याने आतापर्यंत 4 लाख 33 हजार टन उसाचे गाळप करून 4 लाख 45 हजार क्विंटल साखर उत्पादित केली आहे. तर ज्ञानेश्‍वर कारखान्याने 3 लाख 91 हजार क्विंटल साखर निर्मिती केली आहे. गाळपासाठी आता कमी ऊस शिल्लक राहिला आहे. त्यात कार्यक्षेबाहेरील ऊस आणून गाळप करण्याचा प्रयत्न सुरू आहे. श्रीगोंदा, राहुरी तालुक्यातील एकही कारखाना यंदा सुरू न झाल्याने या दोन तालुक्यांतील जास्तीत जास्त ऊस आणून गाळप करण्याचा प्रयत्न आहे. शिल्लक ऊस पाहता कारखाना फेब्रुवारीच्या मध्यानंतर हा कारखाना बंद होईल, असे सांगितले जात आहे.
मिळेल त्या उसाचे गाळप होत असल्याने यंदा साखर उताराही घटला आहे. जिल्ह्याचा सरासरी साखर उतारा दहा ते साडेअकरा टक्के असतो. यंदा खासगी व सहकारी कारखान्याचा सरासरी साखर उतारा 9.72 टक्के आहे. यंदा अगस्ती कारखानाचा साखर उतारा सर्वाधिक साडेदहा टक्के आहे. काळे, थोरात, प्रवरा, क्रांती शुगर या कारखानाचा उतारा दहा टक्कांच्या आसपास आहे. तर इतर कारखान्यांचा साखर उतारा 8 ते साडेनऊ टक्कांपर्यंत आहे.
