राज्यात फेब्रुवारी महिना संपत असतानाच कडक उन्हाचा तडाखा जाणवू लागला आहे. सकाळपासूनच पडणाऱ्या तीव्र उन्हामुळे मे महिन्यासारखा अनुभव येत असून, या बदलत्या हवामानाचा थेट परिणाम आपल्या आरोग्यावर होत आहे. हिवाळा सरता सरता सुरू झालेल्या या उष्म्यामुळे थकवा आणि डिहायड्रेशनच्या तक्रारी वाढल्या आहेत. अशा वेळी आपली जीवनशैली थोडी बदलली, तर आपण या उन्हाच्या झळांपासून स्वतःचा बचाव करू शकतो.
खाण्यापिण्याच्या सवयीत करा ‘हे’ बदल
अचानक वाढलेल्या उष्णतेमुळे शरीरातील पाण्याचे प्रमाण कमी होते. त्यामुळे दिवसभरात किमान ३ ते ४ लिटर पाणी पिणे आवश्यक आहे.
नैसर्गिक पेयांचा वापर: चहा किंवा कॉफीऐवजी ताक, शहाळे, कोकम सरबत किंवा लिंबू पाणी यांसारख्या नैसर्गिक पेयांना पसंती द्या. यामुळे शरीरातील इलेक्ट्रोलाईट्सचे प्रमाण संतुलित राहते.
हलका आहार: उन्हाळ्यात पचनसंस्था मंदावते, त्यामुळे मसालेदार आणि तेलकट पदार्थ टाळून पचायला हलके अन्न घ्या. आहारात दही, काकडी, टरबूज आणि पालेभाज्यांचा समावेश वाढवा.
दुपारच्या वेळेचे नियोजन
उन्हाची तीव्रता दुपारी १२ ते ४ या वेळेत सर्वाधिक असते. शक्य असल्यास महत्त्वाची कामे सकाळी लवकर किंवा संध्याकाळी उशिरा उरकून घेण्याकडे कल ठेवा. जर दुपारी बाहेर पडणे अनिवार्य असेल, तर सावलीचा आधार घ्या आणि सतत पाणी पीत राहा.
त्वचेची आणि डोळ्यांची काळजी
तीव्र उन्हामुळे त्वचेची जळजळ किंवा रॅशेस येण्याची शक्यता असते. बाहेरून आल्यावर चेहरा थंड पाण्याने धुवा. तसेच, डोळ्यांची जळजळ थांबवण्यासाठी पुरेसा आराम आणि डोळ्यांवर थंड पाण्याच्या पट्ट्या ठेवणे फायदेशीर ठरते.
झोप आणि विश्रांती
उष्णतेमुळे शरीराला लवकर थकवा येतो. त्यामुळे रात्रीची ७ ते ८ तासांची शांत झोप घेणे शरीराचे तापमान नियंत्रित ठेवण्यासाठी मदत करते. दुपारी शक्य असल्यास १०-१५ मिनिटांची ‘पॉवर नॅप’ घेतल्यास ताजेतवाने वाटते.
