हिंदुस्थानी वंशाच्या अंतराळवीर सुनीता विल्यम्स मागील सात महिने आंतरराष्ट्रीय अंतराळ स्थानकात आहेत. अंतराळ स्थानकात त्या सुखरूप असून त्यांची कामे सुरू आहेत. 16 जानेवारी रोजी त्यांनी स्पेसवॉक केला. त्यानंतर आता 30 जानेवारी रोजी त्या पुन्हा अंतराळ स्थानकाबाहेर जाणार आहेत. त्यांच्यासोबत फ्लाइट इंजिनीअर बुच विल्मोर असतील. दोघे मिळून अंतराळ स्थानकाबाहेर सुमारे साडेसहा तास काम करतील.
या मोहिमेत दोघे रेडियो फ्रिक्वेन्सी ग्रुप अँटेना काढून टाकतील. तसेच स्थानकाच्या बाहेर सूक्ष्मजीवांचा शोध घेतील. नासाच्या माहितीनुसार, अंतराळ स्थानकात दीर्घकाळ वास्तव्य केलेल्या या दोघांची मोहीम अंतिम टप्प्यात आहे. मार्च 2025 मध्ये ते पृथ्वीवर परतण्याची शक्यता आहे. अंतराळ स्थानकाबाहेर येण्यापूर्वी सुनीता विल्यम्स आणि बुच विल्मोर यांनी क्वेस्ट एअर लॉकमध्ये त्यांच्या मोहिमेची चांगली तयारी केली. स्पेससूट हेल्मेटची देखभाल आणि सेफर या उपकरणांची तपासणी केली.
