भाजपकडून ईडी, सीबीआय यांच्याकडून गैरव्यवहाराची चौकशी करण्याची धमकी काँग्रेस व राष्ट्रवादी काँग्रेसमधील नेत्यांना दिली जात आहे. यामुळेच राष्ट्रवादीतील काही नेते भाजपात प्रवेश करत असल्याची टीका खासदार सुप्रिया सुळे यांनी केली. कार्यकर्त्यांच्या पाठबळावर पक्ष पुन्हा उभा राहील, असा विश्वासही त्यांनी व्यक्त केला.
संवाद दौऱ्याच्या निमित्ताने राष्ट्रवादीच्या नेत्या व खासदार सुप्रिया सुळे सोमवारी हिंगोली जिल्ह्यातील वसमत येथे आल्या होत्या. यावेळी आयोजीत कार्यकर्ता मेळाव्याला राष्ट्रवादीचे जिल्हाध्यक्ष दिलीप चव्हाण, माजीमंत्री जयप्रकाश दांडेगावकर, आमदार रामराव वडकुते, राजु नवघरे, बालाजी घुगे आदींसह पदाधिकारी उपस्थित होते. या मेळाव्यात सुप्रिया सुळे यांनी मार्गदर्शन केले. तर वसमतचे माजी आमदार व माजी मंत्री जयप्रकाश दांडेगावकर यांनी वसमत विधानसभा मतदारसंघाचा उमेदवार पक्षश्रेष्ठी ठरवतील असे सांगितले. दांडेगावकर यांचे कार्यकर्ते असलेले कृऊबाचे माजी सभापती राजु नवघरे यांनी वसमत विधानसभा क्षेत्रातून निवडणूक लढविण्यासाठी जोरदार तयारी चालविली आहे. त्यामुळे दांडेगावकरांनी मेळाव्यामध्ये अप्रत्यक्षपणे उमेदवारीची इच्छा व्यक्त केल्याची चर्चा होत आहे.
