राज्याच्या तिजोरीत खडखडाट झाल्याने लाडक्या बहिणींना देण्यासाठी पैसे नाहीत. दुसरीकडे हिंदुस्थान-पाकिस्तान युद्धाचे ढग जमले आहेत. अशा परिस्थितीतीत महायुतीचे माणिकराव कोकाटे, जयकुमार रावल आणि आशीष जयस्वाल हे तीन मंत्री मॅकफ्रूट प्रदर्शनाला हजेरी लावण्यासाठी इटलीला निघाले आहेत.
इटलीतील रोमिनी येथे मॅकफ्रूट 2025 हे जगातील एक प्रमुख आंतरराष्ट्रीय फळे आणि भाजीपाला प्रदर्शन 6 ते 8 मे या काळात आयोजित करण्यात आले आहे. यामध्ये सहभागी होण्यासाठी कृषीमंत्री माणिकराव कोकाटे, पणनमंत्री जयकुमार रावल व कृषी राज्यमंत्री आशीष जयस्वाल हे 4 ते 9 मे या काळासाठी दौऱ्यावर जात आहेत.
दौऱ्याचा खर्च बाळासाहेब ठाकरे कृषी व्यवसाय व ग्रामीण परिवर्तन प्रकल्पाअंतर्गत आंतरराष्ट्रीय प्रदर्शनांत सहभागी होण्यासाठी असलेल्या आर्थिक तरतुदीतून भागवण्यात येणार आहे. या दौऱ्यात हिंदुस्थानी दूतावास, इटलीतील चेंबर ऑफ कॉमर्स, आयातदार व वितरक प्रतिनिधींसोबत बैठका होतील.
