रेशनिंगचा तांदूळ काळय़ा बाजारात विक्रीसाठी नेणाऱ्या ट्रकवर नगरच्या स्थानिक गुन्हे अन्वेषण विभागाच्या पथकाने छापा टाकला. यावेळी ट्रकमधून 400 गोण्या तांदळासह 30 लाखांचा मुद्देमाल जप्त केल्यामुळे एकच खळबळ उडाली आहे. सुंदर बबन घुमरे (वय 60, रा. लोणी, ता. जामखेड, जि. अहिल्यानगर), योगेश मोहन भंडारी (रा. जामखेड, ता. जामखेड (फरार) यांचा आरोपीमध्ये समावेश आहे.
पोलीस निरीक्षक आहेर यांना मिळालेल्या माहितीनुसार, पोलीस पथकाने जामखेड-करमाळा मार्गावर सापळा रचून ट्रकवर कारवाई केली. या ट्रकमध्ये पोलिसांना रेशनच्या तांदळाची 400 पोती आढळली. हा तांदूळ काळय़ा बाजारात विक्रीसाठी नेण्यात येत होता. यावेळी पोलिसांनी चालकाला ताब्यात घेतले. त्याने गुह्याची कबुली दिली आहे. पोलिसांनी तांदळाची पोती आणि ट्रक, असा 30 लाखांचा मुद्देमाल जप्त केला. चालकाविरोधात जामखेड पोलीस स्टेशनमध्ये गुन्हा दाखल केला आहे. पोलीस निरीक्षक दिनेश आहेर, उपनिरीक्षक अनंत सालगुडे, विश्वास बेरड, बिरप्पा करमल, हृदय घोडके, रोहित मिसाळ व भगवान धुळे यांच्या पथकाने ही कारवाई केली.
