महाराष्ट्राच्या टेनिसपटूंनी सातव्या खेलो इंडिया युवा क्रीडा स्पर्धेत एक सुवर्ण, एक रौप्य व दोन कांस्य अशा एकूण चार पदकांना गवसणी घातली. मुलींच्या दुहेरीत ऐश्वर्या जाधव-आकृती सोनकुसारे या जोडीला सुवर्णपदक मिळाले. ऐश्वर्या जाधवनने मुलींच्या एकेरीतही रौप्यपदकाची कमाई केली. मुलांच्या एकेरीत अर्नव पापरकर, तर मुलींच्या दुहेरीत नैनिका रेड्डी व प्रिशा शिंदे जोडीला कांस्यपदक मिळाले.
ऐश्वर्या जाधवचे दुहेरी यश
मुलींच्या दुहेरीत महाराष्ट्राच्या ऐश्वर्या जाधव-आकृती सोनकुसारे या द्वितीय मानांकित जोडीने अंतिम फेरीत तेलंगणाच्या लक्ष्मी दांडू व रिशिता रेड्डी या अव्वल जोडीचा 6-0, 6-4 असा सरळ सेटमध्ये पराभव करीत सुवर्णपदकावर नाव कोरले. याचबरोबर ऐश्वर्या जाधवन हिने मुलींच्या एकेरीत रौप्यपदक जिंकले. सुवर्णपदकाच्या लढतीत या द्वितीय मानांकित खेळाडूला अव्वल मानांकित तेलंगणाच्या रिशिता रेड्डी हिने 6-1, 2-6, 6-3 असे हरविले. पहिला सेट गमविल्यानंतर ऐश्वर्याने दुसरा सेट जिंकून लढतीत पुनरागमन केले होते, मात्र तिसऱया व निर्णायक सेटमध्ये अनेक टाळता येण्याजोग्या चुका केल्याने ऐश्वर्याला रौप्यपदकावर समाधान मानावे लागले.
मुलांच्या एकेरीत अव्वल मानांकित महाराष्ट्राच्या अर्नव पापरकरने चतुर्थ मानांकित समर्थ साहिता याचा 6-0, 5-2 असा धुव्वा उडवून कांस्यपदक जिंकले. दुसऱया सेटमध्ये दुखापतीमुळे समर्थने 2-5 असे पिछाडीवर असताना लढत सोडून दिली. मुलींच्या दुहेरीत नैनिका रेड्डी व प्रिशा शिंदे या महाराष्ट्राच्या बिगरमानांकित जोडीने चतुर्थ मानांकित उत्तर प्रदेशच्या महिका खन्ना व शगून कुमारी या जोडीचा 6-2, 6-2 असा पराभव करीत कांस्यपदकाला गवसणी घातली.
