सत्ता आणि पैशांच्या जोरावर ऐतिहासिक ठेवा असलेल्या शाहूकालीन व शहराच्या मोक्याच्या जागा हडप करणाऱ्या प्रवृत्तीविरोधात शिवसेना (उद्धव बाळासाहेब ठाकरे) पक्षाने जनआंदोलन पुकारले आहे. या पार्श्वभूमीवर सत्तेचा दबाव आणि सरकारी हातमिळवणीतून कावळा नाका परिसरातील शासकीय रेस्ट हाऊस जागा विक्रीचा झालेला डाव हाणून पाडण्याचा प्रयत्न केला. पण, खासगी बिल्डरने जागा कुलूपबंद केल्याने संतप्त शिवसैनिकांनी प्रवेशद्वारासमोरच छत्रपती शाहू महाराज तसेच सर विश्वेश्वरया यांच्या प्रतिमेचे पुजन करून निषेध नोंदविला. या वेळी बिल्डरधार्जिण्या सरकारसह दडपशाही करणाऱ्या पोलीस प्रशासनाविरोधात घोषणाबाजीने वातावरण तणावपूर्ण बनले होते.
सत्तेच्या दुरुपयोगातून काही ठराविक बिल्डरांना हाताशी धरून मोक्याच्या सरकारी, निमसरकारी जागा पद्धतशीरपणे कवडीमोल दरात हडप करण्याचा उद्योग सुरू आहे. काही प्रशासकीय अधिकाऱ्यांचाही यामध्ये सहभाग दिसून येत आहे. यातूनच जयप्रभा स्टुडिओ, अमेरिकन मिशन जागा, मिरजकर तिकटी येथील महसूल भवन, शालिनी स्टुडिओ, उपजिल्हाधिकारी यांचा बंगला आदी सरकारी जागा हडप करून, कोटय़वधी रुपयांची लूट सुरू आहे. या पार्श्वभूमीवर आज छत्रपती शाहू महाराज यांच्या जयंतीदिनी या जागेवर जाऊन बंदिस्त पत्रे काढण्यासह छत्रपती शाहू महाराज आणि भारतरत्न विश्वेश्वरया यांच्या प्रतिमांचे पुजन करणार असल्याचा इशारा शिवसेना (उद्धव बाळासाहेब ठाकरे) पक्षाचे उपनेते व जिल्हाप्रमुख संजय पवार तसेच सहसंपर्कप्रमुख विजय देवणे यांनी दोन दिवसांपूर्वी दिला होता. आंदोलनात करवीर तालुकाप्रमुख राजू यादव, हर्षल सुर्वे, विशाल देवकुळे, प्रतिज्ञा उत्तुरे, महेश उत्तुरे आदी शिवसैनिक उपस्थित होते.
