नेपाळमध्ये भ्रष्टाचार आणि हुपूमशाहीविरुद्ध तरुणांनी उठाव केला. महाराष्ट्रात आणि देशातही ही परिस्थिती निर्माण होऊ शकते. भ्रष्टाचार आणि सरकारच्या दडपशाहीविरुद्ध लोकांच्या मनात प्रचंड चीड आणि असंतोष आहे. त्याकडे राज्यकर्त्यांनी गांभीर्याने पाहावे, असे विधान शिवसेना नेते–खासदार संजय राऊत यांनी केले होते. त्यावरून शिंदे गटाने संजय राऊत यांच्यावर गुन्हा दाखल करण्याची मागणी केली.
शिंदे गटाने आज मुंबईचे पोलीस आयुक्त देवेन भारती यांची भेट घेऊन निवेदन दिले व संजय राऊत यांच्याविरुद्ध देशद्रोहाचा गुन्हा दाखल करण्याची मागणी केली. त्याआधी राऊत यांच्याविरुद्ध पोलीस ठाण्यातही तक्रार करण्यात आली.
ये डर अच्छा है…
‘नेपाळच्या तरुणांनी क्रांतीचा मार्ग दाखवला. भ्रष्ट शासनकर्त्यांना रस्त्यावर आणले. भ्रष्टाचार करून पैसा आणि सत्ता मिळवली की कधीतरी नेपाळ होणारच…ये डर अच्छा है’, अशी ‘एक्स’ पोस्ट यावर संजय राऊत यांनी केली.
