अयोध्येतील राम मंदिरावर रामध्वजा फडकावून पंतप्रधान नरेंद्र मोदी यांनी राम राम करायचे आणि नाशिकमध्ये प्रभू श्रीरामांच्या पदस्पर्शाने पावन तपोवनातील झाडे कापायची म्हणजे भाजपचे हिंदुत्व थोतांड आहे. कंत्राटदाराच्या घशात जागा घालण्यासाठी ही कत्तल केली जाणार असून मुंह में राम आणि बगल में अदानी हेच भाजपचे हिंदुत्व आहे, असा घणाघात शिवसेना पक्षप्रमुख उद्धव ठाकरे यांनी केला. कुंभमेळा व साधूग्रामला शिवसेनेचा विरोध नाही. पण त्याच्या नावावर हजारो झाडांची कत्तल करून सरकार पदरी पुण्य पाडून घेण्याचा केविलवाणा प्रयत्न करण्याचा देखावा निर्माण करतेय त्याला शिवसेनेचा विरोध आहे, असे उद्धव ठाकरे म्हणाले.
उद्धव ठाकरे यांनी आज ‘मातोश्री’ निवासस्थानी पत्रकार परिषद बोलवून प्रसारमाध्यमांशी संवाद साधला. पुढच्या वर्षी नाशिकमध्ये होणाऱया कुंभमेळय़ासाठी साधूसंत आणि भाविकांच्या सोयीसाठी तपोवनात साधूग्राम उभारले जाणार आहे. त्यासाठी काढण्यात आलेल्या टेंडरची प्रत दाखवत उद्धव ठाकरे यांनी भाजपच्या भ्रष्टाचाराचा पर्दाफाश केला. ते म्हणाले की, कुंभमेळय़ाला येणाऱया लाखो साधूसंत आणि भाविकांना सुविधा पुरवण्याचे काम सरकारचे असते. पण ते पारदर्शक असणेही महत्त्वाचे आहे. प्रभू श्रीरामचंद्र, सीतामाई आणि लक्ष्मण यांच्या पदस्पर्शाने पावन तपोवनातील हजारो झाडे तोडून साधूग्राम बनवले जाणार आहे. तपोवनात जवळपास 60 प्रजातींची झाडे आहेत. त्यात अनेक औषधी वनस्पती आहेत. साधूग्राम बनवण्यास शिवसेनेचा विरोध नाही, पण ते तपोवनात बनवण्यास मात्र आक्षेप आहे, असे उद्धव ठाकरे यांनी ठणकावून सांगितले.
हा हिंदुत्वाच्या नावाखाली कंत्राटदारासाठी चाललेला भ्रष्टाचार
तपोवनात कुंभमेळय़ानंतर नवीन झाडे लावण्यात येतील असे कुंभमेळा मंत्री गिरीश महाजन यांनी सांगितले आहे, मग गेल्या वेळी जिथे साधूग्राम बनवले होते त्याजागी का उभारले जात नाही, असा सवाल उद्धव ठाकरे यांनी केला. तपोवनाची जागा नंतर कंत्राटदाराच्या घशात घालण्यासाठी झाडे कापली जाणार आहेत आणि आक्षेप कुणी घेऊ नये म्हणून कुंभमेळय़ाचे कारण दिले जात आहे, असा नाशिककरांचा आरोप असून शिवसेनाही त्याला सहमत आहे, असे उद्धव ठाकरे म्हणाले. आहेत ती झाडे मारून टाकायची आणि नव्याने झाडे लावू अशी लोणकढी थाप मारायची हा हिंदुत्वाच्या नावाखाली चाललेला भ्रष्टाचार आहे, अशी टीका करताना भाजपचे हे कारस्थान हाणून पाडले पाहिजे, असे आवाहन त्यांनी केले. नाशिकचा पालकमंत्री आजवर नेमला का जात नाही हे कोडे आहे, त्याचे उत्तर कुंभमेळय़ाच्या खर्चात आहे का, असा बोचरा सवालही त्यांनी केला.
नाशिकचा नव्हे हा राज्याचा विषय
महायुती सरकारने कंत्राटदारांच्या फायद्यासाठी मुंबईत झाडांची कत्तल केली. आता नाशिकची वेळ आहे. हळूहळू हे सर्वत्र होत जाणार आहे. त्यामुळे हा एका शहराचा नाही तर राज्याचा विषय आहे, असे सांगतानाच, शिवसेना या मुद्दय़ावरून नाशिकच्या जनतेसोबत आहे, अशी ग्वाही उद्धव ठाकरे यांनी दिली. असेच होत राहिले तर भविष्यात श्वास घ्यायला त्रास होणार आहे याची जाणीव झालेल्या पर्यावरणप्रेमींनीच नव्हे तर सर्वांनी याला विरोध केला पाहिजे, अशी सादही त्यांनी घातली.
