मुंबई महानगरपालिकेने प्रसिद्ध केलेल्या प्रारूप मतदार यादीवर 3 डिसेंबरपर्यंत मतदारांना हरकती- सूचना दाखल करता येणार आहेत. यामध्ये चुकीच्या प्रभागात नाव आल्याची तक्रार आल्यास संबंधित अधिकाऱयांनी पत्त्यावर जाऊन स्वतः याबाबत खातरजमा करावी आणि आवश्यक कार्यवाही करावी, असे निर्देश आज पालिका आयुक्त तथा जिल्हा निवडणूक अधिकारी भूषण गगराणी यांनी दिले.
प्रभागनिहाय प्रारूप मतदार यादी कार्यवाहीबाबत आज पालिकेच्या भायखळा येथील वीरमाता जिजाबाई भोसले उद्यान व प्राणिसंग्रहालय येथे आज पार पडलेल्या बैठकीत ते बोलत होते. मुंबई महानगरपालिकेने जाहीर केलेल्या प्रारूप मतदार यादीत एकाच व्यक्तीचे 103 वेळा नाव, तर 4 लाख 33 हजार मतदारांची दुबार नावे असल्याचे समोर आले आहे. त्यामुळे आधी मतदार याद्या दुरुस्त कराव्यात अशी मागणी विरोधकांकडून करण्यात येत आहे. तर पालिकेच्या पातळीवर निवडणूक आयोगाच्या निर्देशानुसार मतदार यादीवर आलेल्या हरकती-सूचनांबाबत कार्यवाही करण्यात येत आहे. आगामी पालिका निवडणुकीसाठी 1 जुलै 2025 या अर्हता दिनांकावर आधारित मतदार याद्यांच्या आधारे प्रभागनिहाय तयार करण्यात आलेली मतदार यादी प्रसिद्ध करण्यात आली आहे. या प्रारूप मतदार यादीवरील नोंदवण्यात येणाऱ्या हरकती व सूचनांची दखल घेऊन आवश्यक योग्य कार्यवाही करण्याचे निर्देश पालिका आयुक्तांनी दिले.
तपासणी सहाय्यक आयुक्तांनी स्वतः करावी
प्रारूप मतदार यादीवर येणाऱ्या हरकती-सूचनांवर संबंधित विभागाच्या सहाय्यक आयुक्तांनी स्वतः पडताळणी करावी, अशा सूचना यावेळी अतिरिक्त आयुक्त अश्विनी जोशी यांनी दिल्या. या प्रक्रियेवर देखरेखीसाठी परिमंडळ उप आयुक्त यांची नेमणूक केल्याचेही त्यांनी स्पष्ट केले. प्रत्येक वॉर्ड ऑफिसमध्ये हेल्प डेस्क सुरू केला असून दुबार मतदारांना इथे माहिती दिली जाईल, दुबार मतदारांशी निवडणूक अधिकारी, कर्मचारी यांच्याकडून संवाद साधला जाईल, असे विशेष कार्य अधिकारी (निवडणूक) विजय बालमवार यांनी सांगितले.
