जयदत्त क्रीडा मंडळ आयोजित राज्य मानांकन कॅरम स्पर्धेच्या पुरुष एकेरी गटाच्या अंतिम फेरीत मुंबईच्या सिद्धांत वाडवलकरने भन्नाट कामगिरी करत जेतेपद पटकावले. तसेच महिलांच्या गटात नीलम घोडके अजिंक्य ठरली.
प्रभादेवीच्या राजाभाऊ साळवी मैदानात आयोजित राज्य पॅरम स्पर्धेत सिद्धांत वाडवलकरने माजी राष्ट्रीय विजेत्या मुंबईच्या संजय मांडेचा तीन सेटमध्ये पराभव केला. मांडेने या स्पर्धेत प्रशांत मोरे व सागर वाघमारेसारख्या दिग्गज खेळाडूंवर विजय मिळवला होता. तोच विजयी ठरणार असा प्रेक्षकांचा विश्वास होता. पण वाडवलकरने प्रेक्षकांचा अंदाज आणि विश्वास खोटा ठरवला. पहिला सेट सिद्धांतने 21-16 असा जिंकून आघाडी घेतली होती. मात्र दुसऱया सेटमध्ये अनुभवाचा फायदा उठवत संजयने हा सेट 25-19 असा जिंकला व सामान्य चुरस निर्माण केली. तिसऱया आणि अंतिम सेटमध्ये पहिल्या सहा बोर्डापर्यंत सामना रंगतदार अवस्थेत चालला होता. मात्र सातवा बोर्ड सिद्धांतने सात गुणांचा घेत आघाडी घेतली आणि आठव्या बोर्डनंतर 23-13 अशा फरकाने सेट व सामना आपल्या खिशात घातला. संजय मांडेने अंतिम फेरीत प्रवेश करण्यापूर्वी पुण्याच्या सागर वाघमारेला 2-25, 19-17 व 19-14 असे हरवले, तर मुंबईच्या सिद्धांत वाडवलकरने ठाण्याच्या झैद अहमदचा 25-19, 25-0 असा पराभव केला.
महिला गटाच्या अंतिम सामन्यात नीलम घोडकेने विजय मिळवला. हा सामनाही अतिशय चुरशीचा झाला. सिंधुदुर्गच्या केशर निर्गुणने पहिला सेट 24-7 असा सहज जिंकला होता, मात्र पुढील दोन सेट नीलमने आक्रमक खेळाच्या जोरावर 25-11, 25-13 असे जिंकून या गटाचे विजेतेपद मिळवले. अंतिम फेरीत प्रवेश करण्यापूर्वी नीलमने मुंबईच्या अंबिका हरिथवर 21-14, 23-18 अशी मात केली, तर केशरने मुंबईच्या अंबिका हरिथला 25-11, 18-17 असे नमवले होते.
