पालिका निवडणुकांसाठी मतदान व मतमोजणीकरिता पुरेशा प्रमाणात अधिकारी व कर्मचाऱ्यांची नियुक्ती करणे आवश्यक आहे. या सर्वांचे वेळेत प्रशिक्षणही पूर्ण झाले पाहिजे. त्यामुळे निवडणूक प्रशिक्षणास गैरहजर राहणाऱ्या अधिकारी-कर्मचाऱ्यांवर कडक कारवाई करण्यात यावी, असे निर्देश राज्य निवडणूक आयुक्त दिनेश वाघमारे यांनी दिले आहेत.
पालिका निवडणुकांसाठी मतदान व मतमोजणीची तयारी तसेच कायदा व सुव्यवस्थेसंदर्भात सर्व २९ महानगरपालिका आयुक्त, संबंधित पोलीस आयुक्त व जिल्हा पोलीस अधीक्षक, तसेच निवडणूक निर्णय अधिकाऱ्यांची गेले दोन दिवस व्हीसीच्या माध्यमातून बैठक घेण्यात आली. पालिका निवडणुकांच्या प्रचाराची मुदत १३ जानेवारी रोजी सायंकाळी साडेपाच वाजता संपणार आहे. त्यानंतर कुठल्याही प्रसारमाध्यमांद्वारे निवडणूकविषयक जाहिराती प्रसिद्ध किंवा प्रसारित करता येणार नाहीत, असे त्यांनी स्पष्ट केले.
