येत्या 10 फेब्रुवारीपासून बारावीची लेखी परीक्षा सुरू होणार आहे. ही परीक्षा 18 मार्चपर्यंत चालणार आहे. विद्यार्थ्यांना उद्यापासून बारावीचे हॉल तिकीट मिळणार आहे. महाराष्ट्र राज्य माध्यमिक व उच्च माध्यमिक शिक्षण मंडळाने ही माहिती दिली आहे.
इयत्ता बारावीच्या परीक्षेला बसणाऱया विद्यार्थ्यांची हॉल तिकीट ऑनलाईन पद्धतीने मिळणार आहे. संबंधित शाळा व ज्युनिअर कॉलेज यांनी हॉल तिकिटांचे प्रिंट आऊट काढून विद्यार्थ्यांना वितरित करावी, अशा सूचना राज्य मंडळाकडून करण्यात आल्या आहेत.
बारावीच्या परीक्षेला आता काही दिवसच शिल्लक राहिले असून तोंडी व लेखी परीक्षा जवळ आल्या आहेत. या पार्श्वभूमीवर राज्य मंडळाने सर्व विभागीय मंडळांमार्फत विद्यार्थ्यांच्या हॉल तिकिटांच्या प्रिंट आऊट उपलब्ध करून दिल्या आहेत. हॉल तिकीट देताना शाळा किंवा कनिष्ठ महाविद्यालयांनी विद्यार्थ्यांकडून कोणतेही अतिरिक्त शुल्क घेऊ नये, असे स्पष्ट करण्यात आले आहे. तसेच हॉल तिकिटावर मुख्याध्यापक किंवा प्राचार्य यांचा शिक्का व स्वाक्षरी असणे बंधनकारक आहे.
ऑनलाईन दुरुस्ती करता येणार
हॉल तिकिटावर नाव, आईचे नाव, जन्मतारीख आदी तपशीलात काही त्रुटी असल्यास त्या दुरुस्त्या केवळ ऑनलाईन पद्धतीनेच कराव्या लागणार आहेत. यासाठी ‘ऑप्लिकेशन करेक्शन’ ही लिंक उपलब्ध करून देण्यात आली आहे.
