पश्चिम आशियातील समुद्रात सुरू असलेला तणाव आता अधिकच चिघळला आहे. थायलंडचे एक मोठे मालवाहू जहाज, जे हिंदुस्थानच्या दिशेने येत होते, त्यावर होर्मुझच्या सामुद्रधुनीत (Strait of Hormuz) भीषण हल्ला झाल्याची धक्कादायक घटना समोर आली आहे. मयुरी नारी या जहाजावर २३ जण होते. थायलंडच्या नौदलाने तात्काळ मदत केली आणि २० खलाशांना वाचवले, तर तीन जण बेपत्ता असल्याची माहिती समोर येत आहे. या हल्ल्यामुळे आंतरराष्ट्रीय सागरी मार्गावरील सुरक्षेचा प्रश्न पुन्हा एकदा ऐरणीवर आला आहे.
मिळालेल्या माहितीनुसार, होर्मुझच्या सामुद्रधुनीजवळ आज आणखी दोन जहाजांवर हल्ला करण्यात आला. इराणने होर्मुझच्या सामुद्रधुनीतून जाणाऱ्या जहाजांवर हल्ला करण्याची धमकी दिली आहे, ज्यामुळे हा परिसर धोकादायक आणि असुरक्षित बनला आहे. होर्मुझची सामुद्रधुनी हा एक महत्त्वाचा आणि धोरणात्मक मार्ग आहे. तेथील हल्ल्यांमुळे सागरी व्यापार आणि जागतिक आर्थिक चक्रावर मोठा परिणाम होऊ शकतो.
होर्मुझची सामुद्रधुनी का महत्त्वाची आहे?
हा अरुंद सागरी मार्ग पर्शियन आखाताला (फारसची खाडी) अरबी समुद्राशी जोडतो. जगातील तेल आणि नैसर्गिक वायूच्या पुरवठ्यासाठी हा जलमार्ग अत्यंत महत्त्वाचा मानला जातो. जगातील एकूण तेल आणि नैसर्गिक वायूच्या पुरवठ्यापैकी २० टक्के पुरवठा याच मार्गावरून होतो. सौदी अरेबिया, संयुक्त अरब अमिराती (UAE), कुवेत आणि इराक यांसारखे देश आपले तेल याच मार्गावरून निर्यात करतात. त्यामुळेच हा मार्ग जागतिक ऊर्जा पुरवठ्याची लाईफलाईन मानला जातो.
