बारामतीमध्ये झालेल्या भीषण चार्टर विमान अपघातात महाराष्ट्राचे उपमुख्यमंत्री अजित पवार यांचे निधन झाल्याची हृदयद्रावक घटना घडली आहे. या बातमीने संपूर्ण महाराष्ट्रावर शोककळा पसरली असून राजकीय वर्तुळातून मोठी हळहळ व्यक्त होत आहे. शिवसेनेच्या (उद्धव बाळासाहेब ठाकरे) पक्षाच्या खासदार प्रियंका चतुर्वेदी यांनी एका वृत्तवाहिनीला दिलेल्या मुलाखतीदरम्यान या घटनेवर तीव्र दुःख व्यक्त केले. यावेळी त्यांना आपल्या भावना अनावर झाल्या आणि त्या कॅमेऱ्यासमोरच रडल्या.
‘महाराष्ट्रासाठी हे अत्यंत वेदनादायी’
‘इंडिया टुडे’शी बोलताना प्रियंका चतुर्वेदी अत्यंत भावूक झाल्या होत्या. त्या म्हणाल्या, ‘अजित पवार यांच्याकडे महाराष्ट्राच्या प्रगतीसाठी अत्यंत प्रगल्भ आणि मोठ्या कल्पना होत्या. अशा पद्धतीने त्यांचे अचानक सोडून जाणे खूप वेदनादायी आहे. महाराष्ट्रासाठी हे कधीही भरून न निघणारे नुकसान आहे.’
पहाटे ६ पासून कामाचा धडाका: त्यांच्या निष्ठेची आठवण
अजित पवार यांच्या कामाच्या पद्धतीचा उल्लेख करताना चतुर्वेदी म्हणाल्या, ‘अजित दादा हे राज्यासाठी पूर्णपणे समर्पित असलेले नेते होते. पहाटे ६ वाजल्यापासून कामाला सुरुवात करून उशिरा रात्रीपर्यंत ते कार्यरत असायचे. त्यांची ही कार्यपद्धतीच त्यांच्या कामाप्रती असलेल्या निष्ठेची साक्ष द्यायची. जरी आम्ही राजकीय दृष्ट्या एकमेकांचे विरोधक होतो, तरीही त्यांच्या कामाप्रती असलेल्या प्रामाणिकपणाचा आदर सर्वांनाच होता.’
लाईव्ह मुलाखतीदरम्यान भावूक क्षण
मुलाखत सुरू असताना प्रियंका चतुर्वेदी यांना अश्रू रोखणे कठीण झाले. ‘मला पवार साहेबांबद्दल (शरद पवार आणि कुटुंबीय) खूप वाईट वाटतंय. आपण हे थांबवू शकतो का? मी १० मिनिटांनंतर पुन्हा बोलते,’ असे म्हणत त्यांनी मुलाखत थांबवण्याची विनंती केली. अजित पवार यांच्या निवासस्थानी त्यांचे नातेवाईक आणि कार्यकर्ते जमल्याची माहिती मिळाल्यानंतर, ‘मला त्यांच्या घरी जायला हवे, ते तिथेच असतील,’ असे म्हणत त्या तातडीने रवाना झाल्या.
