ऑक्सिओम-4 मिशन चौथ्यांदा पुढे ढकलण्यात आले आहे. आंतरराष्ट्रीय अंतराळ स्थानकासाठी प्रक्षेपित होणारे ऑक्सिओम-4 मिशन बुधवारी सायंकाळी साडेपाच वाजता फ्लोरिडा येथील केनेडी स्पेस सेंटरमधून स्पेसएक्सच्या फाल्कन-9 रॉकेटचे प्रक्षेपण होणार होते. परंतु ते द्रव ऑक्सिजन गळतीमुळे पुढे ढकलण्यात आल्याची माहिती भारतीय अंतराळ संशोधन संस्था (इस्रो) ने दिली आहे. आज सकाळी प्रक्षेपण वाहनाच्या बूस्टर स्टेजची कामगिरी तपासण्यात आली. प्रोपल्शन बेमध्ये एलओएक्समध्ये ऑक्सिजन गळती आढळून आल्याने मोहीम पुढे ढकलण्यात आल्याची घोषणा करण्यात आली. या मोहिमेची नवीन तारीख लवकरच जाहीर केली जाईल, असे सांगण्यात आले. या मिशनमध्ये चार देशांचे चार अंतराळवीर 14 दिवसांसाठी अंतराळ स्थानकात जाणार आहेत. या मोहिमेचे आज उड्डाण झाले असते तर हिंदुस्थानचे अंतराळवीर शुभांशू शुक्ला यांच्यासह चार अंतराळवीर 12 जून रोजी रात्री 10 वाजता आंतरराष्ट्रीय अंतराळावर पोहोचले असते. या ठिकाणी अभ्यास करून ते 25 ते 26 जून रोजी पुन्हा पृथ्वीवर परतले असते. ऑक्सिओम-4 मिशनचे पायलट असलेले शुभांशु शुक्ला हे एक अनुभवी लढाऊ आणि चाचणी वैमानिक आहेत. त्यांना 2000 तासांहून अधिक उड्डाणाचा अनुभव आहे.
उड्डाण चौथ्यांदा टळले
ऑक्सिओम-4 मिशनचे प्रक्षेपण पुढे ढकलण्याची ही चौथी वेळ आहे. यापूर्वी ही मोहीम 29 मे रोजी प्रक्षेपित होणार होती, परंतु काही तांत्रिक कारणामुळे ती पुढे ढकलण्यात आली. त्यानंतर ते 8 जून, 10 जून आणि 11 जून अशी सलग तिसऱयांदा पुढे ढकलण्यात आली आहे. आता हे प्रक्षेपण कधी होणार यासंबंधीची नवी तारीख अद्याप जाहीर करण्यात आली नाही.
